Museum Week ni 24 -28 Ferbuary, 2-14 chhunga hman tur, Mizoram State Museum, Art & Culture Department buatsaih chu vawiin khan Art & Culture Minister Pu R.Romawia’n a hawng a. Museum week hman chhung hian sawrkar pisa kai hun chhungin museum hi a duh apiang tan a thlawna tlawh theih a ni.

Museum Week hawnna inkhawm hi State Museum Library Room-a neih niin, Pu Ngurbiaka, Director Art & Culture-in inkhawm hi a kaihruai a, Pu Lalchuailova, Museum Curator-in Museum chungchang report a pe a. He hunah hian Khuallian Pu R. Romawia, Art & Culture Minister chuan, Mizoramin Museum a neih chhun thawktute’n uluk taka an enkawl chu lawmawm a tih thu a sawiin, “museum hi hnam history a taka pholanna pawimawh tak a ni a, min thlahtu kan pi leh pute chanchin a taka min hmuh tir thei tu a ni” a ti. Museum hlutna chang hre tura inzirtirna uar a tul thu a sawi bawk a. Minister chuan tun dinhmunah chuan museum hmunhma te leh thil phochhuah ten duhthu a la sam tawklo a ni tiin, museum thuam that nan state sorkar chuan hma a la zel a ni, a ti. Lemziak leh thlalak Mizo nun ziarang phochhuak theitu bakah mizo pasaltha te lim emaw lemziak dah tam ni se a duh thu a sawi bawk.

Museum Week hi kum 2004 atang khan kumtin hman thin a ni a, hemi chhung hian mipui tan en man awm lova museum hi hawn thin a nih bakah School hrang hrangte a bika sawm thin an ni. Tun kum Museum Week pual hian MHIP Branch leh MUP Branch 10 te Museum en turin a bik taka sawm an ni.

Mizoram State Museum hi kum 1977-ah Education Department hnuaiah a lo piang a. Kum 1989-a Education Department chu Department pathum i.e School Education, Higher & Technical leh Art & Culture Department-a then a nih khan Mizoram State Museum chu Art & Culture Department hnuaiah tun thlengin dah a lo ni ta a ni. Museum-ah hian Gallery paruk – History Gallery, Anthropology Gallery, Ethnology Gallery, Textile Gallery, Zoology Gallery leh Archeology Gallery-te a awm a ni. Museum en man hi naupang tan Rs.5/-  niin, puitling tan Rs.10/- a ni a, school naupang zirtirtu hova en te chu a man chanve-a en tir theih a ni a. Puitling kum 65 chin chunglam te tan en man lak a ni lo. Museum-ah hian tun dinhmunah museum objects chi hrang hrang 936 pho chhuah mek niin, Reserve Collection Room-ah Museum objects 2768 dah that mek a ni a, tuna museum objects neih zawng zawng zat chu 3704 a ni.

Museum tihchangtlung leh tih hmasawn zel nana sorkar hmalakna kal zela New Secretariat Complex-a Museum Extension Building sak mek chu luah theiha peih fel tep a ni tawh a. Hemi atan hian Sorkar laipuia Ministry of Culture atangin Rs. 3.62 vbc hmuh a ni a; Rs. 62 lacs chu Mizoram Sorkar tum tur a ni.