Tunkar ni 20.2.2014 (Nilaithawhtan) khan Geology & Mining Minister Pu Rohluna leh Parliamentray Secretary Pu Joseph Lalhimpuia te chuan Oil India Ltd. Chairman & Managing Director Pu Sunil Kumar Srivastava chu Noida, Uttar Pradesh-a a office-ah hmuin Mizorama leihnuai hausakna zawn mekah OIL chuan chak zawkin hmalakna kalpui se an duh thu an thlen a ni.

G&M Minister Pu Rohluna chuan Maubuang leh Thenzawl-a OIL Block chan chhungah an hmalaknate a hmunah ngei a enpui tawh thu sawiin ‘site preparation’ an zawhfel tawh chu a lawmawm hle a, Keifang lam pawh peihfel tep a ni a, heng hmun atanga oil la chhuak thei turin ‘rig’ bun thuai nise a duh thu OIL Chairman a hrilh a ni. OIL hnuaiah Mizo thalai tam zawkte hnathawk theihna tur leh tuna contract anga chhawr mekte pawh a ngheta rawih chhunzawm theih dan ngaihtuahsak turin a thlen bawk a ni.

Parliamentary Secretary Pu Joseph Lalhimpuia pawhin Mizo thalaite tam zawka chhawr an nih theih nan ‘Short Course Skill Development’ buatsaih nise a duh thu Chairman hnenah a thlen a. OIL leh Education Department te thawhho theih dan tur kawng zawn chu tha a tih thu te, mipuite thianghlimna leh faina lam inzirtir kawngahte leh environment humhalh kawngahte Mizoram sorkar nen thawhho dan kawng zawn nise a duhthu a hrilh bawk a ni.

OIL Chairman Pu Sunil Kumar Srivasatava chuan ‘rig’ buna oil lakchhuah hna thawk turin Shivani Company hnenah September 2013 khan Letter of Intent pek a ni tawh a, amaherawhchu tun thlenga hna an la tan theih loh avangin Black List-a dah a, Tender pawh a thara koh tula an hriat avangin thutlukna siam turin Board pawh thukhawm thuai an tum thu hrilh a ni. Mizoram sorkar leh mipuiin leihnuai hausakna zawnchhuah kawngah Company-te theihtawpa an lo thlawp leh tanpui thinna chungah lawmthu a sawi a. Minister leh Parliamentray Secretary ten a hnenah thu an thlente ngaihtuah turin February ni 24, 2014 khian Mizoram enkawltu bik Group-te meeting a neihpui nghal tur thu a hrilh bawk a ni.