India leh Myanmar ram pahnih te ramria insumdawn tawnna kawnga Mizoram in harsatna a neihte leh Kaladan multi-modal project chungchanga Mizoram dinhmun rawn enfiahin Ambassador of India to Myanmar, Pu Aloke Sen chuan nimin khan Aizawl a lo thleng a. Tlaiah Chief Minister Pu Lal Thanhawla chu a chenna in, Zarkawt-ah hmuin hemi chungchanga inkawmna an nei.

Chief Minister a hmuh hmain Pu Sen chuan Chief Secretary Pu Vanhela Pachuau chu a office ah a hmu bawk a. Ramria insumdawn tawnna hi India leh Myanmar ram pahnih te chuan zau zawka kalpui an duh thu sawiin Pu Sen chuan border trade leh Kaldan project hlawhtlinna atan Mizoram chu a pawimawh hle tih a sawi a. Kaldan project chu a hun taka tipuitling turin hma lak mek a nih laiin Mizoramin heng thila harsatna a neih te sukiang turin state sorkar chu thawhpui an inhuam tih a tarlang bawk.

Nimin vek khan Pu Sen hi Mizoram Chamber of Commerce & Industry hruaituten State Guest House ah an kawm a. Pu Sen hi Pu T.S.Tirumurti, Jt.Secretary, Border Security Management, Ministry of External Affairs leh Lt.Col.Gautam, MI-II ten an rawn tawiawm a. Vawiin hian lehlangin Zokhawthar an tlawh ang.