Indian Ambassador to Myanmar Pu Aloke Sen leh Justice J. Chalameshwar, Chief Justice, Guwahati High Court  te chuan, nimin tlai khan Chief Minister Pu Lal Thanhawla chu a chenna in Zarkawtah hmuin, inkawmna hun tha tak an nei.

Pu Aloke Sen hi border trade kaihhnawih chungchanga lokal a ni a. Vawiin khan lehlangin Champhai leh Zokhawthar te a tlawh a ni. Ambassador hi T.S. Tirumurti, Jt. Secretary, Border Security Management, Ministry of External Affairs in a rawn tawiawm a ni.

Justice J. Chalameshwar hi New Capital Complex a Raj Bhavan building tur, Mizoram sorkarin High Court building atana pek a remtih tawh chungchanga lokal a ni a. A building pawh hi a fang nghal nghe nghe a ni. Amah hi Justice Ranjan Gogoi, Judge, Guwahati High Court in a rawn tawiawm a ni.

Chief Minister Pu Lal Thanhawla chuan Chief Justice pual hian nizan khan Tourist Lodge, Chaltlang ah zanriah a buatsaih sak a. Chief Minister sawmna angin Aloke Sen te nupa pawh ‘dinner’ ah hian an tel a ni. Pu Hawla chuan Mizoram chu midangte aia kan la hnufual zawk avangin nuamsa deuh zawka kan lo dawngsawng thei lo chu pawi atih thu a sawi a. Mizoram an rawn tlawh avangin Pu Aloke Sen leh Justice J.Chalameshwar te hnenah Chief Minister chuan lawmthu a sawi a ni.