39-Saiha (ST) A.C. atanga ruat, 40-Palak(ST)A.C. biala election duty tur Presiding Officer leh First, Second leh Third Polling Officer te tan vawiin chawhma dar 10:30 atang khan Saiha DC Conference Hall ah Election Training Second Phase (Final Training) neih a ni a. Training hi Addl. D.C. Pu Zorammuana’n kaihruaiin inthlan buaipuitu turte chu an mawhphurhna pawimawhzia te hre renga, inthlahdah leh ngaihsam taka thil ti mai mai lo turin kalkhawmte chu a chah. Vawiina Training hi Election Commission duh dan angin Examination zulzuia kalpui a ni a, chawhnu lamah a tak taka inthlan an buaipui dan tur - form chi hrang hrang ziahfel te, EVM buatsaih dan, etc. te an tihtir vek dawn a ni. Training ah hian officials mi 150 an kal a, Addl DC bakah hian Election Officer Pu H.Lalhmingthanga, ADC(P) Pi Marilyn Rualzakhumthangi leh DRO Pu K.Thankhuma ten an hriat tur tul hrang hrangte an zirtir a ni.

 

 

Ni 9/4/09 ah hian 40-Palak(ST) bial atanga election duty tura thlanchhuah te tan Second Phase Training neih a ni ve leh ang a. Ni 8/4/09 ah inthlannaa hman tur EVM buatsaihna (commissioning) neih a ni ang. EVM Technician Pu S.Radhakrishnan chuan nizan khan Saiha a lo thleng a, EVM commissioning neih laiin a awmpui ang a, khawl siamthat ngai a awm chuan a siam tha nghal ang.

Saiha leh Palak biala Election Observer tura ruat hmasak Pu Sheeldar Singh Yadav chu hmun danga Returning Officer tura ruat a lo nih avangin a remchang leh thei dawn lova, Election Observer atan hian Pu Ivan Marua, Meghalaya Civil Service ruat thar niin vawiin tlai hian Saiha a lo thlen beisei a ni.

Election Directorate, Aizawl nena inbiakpawhna tur bik telephone - Election Hotline, District tina dah tur pawh nimin khan Saiha-a Election Officer Office ah bun fel a ni ve ta.