Mizoram Chief Minister Pu Lal Thanhawla chuan ruahsur nasa avanga tuilian leh leiminin Myanmar chhunga chhiatna nasa tak thleng mek chungchang sawiin Prime Minister Pu Narendra Modi hnenah vawiin khan lehkha a thawn.

Chief Minister chuan Myanmar-ah mi tam tak thi leh hliam, chenna in neilova an awm mek laiin Mizoram ri-a awm Chin State-ah pawh in 100 chuang zet chu leimin avanga tihchhiat a nih thu leh leiminin kawngpui a tihchhiat avangin Mizo hnahthlak tam tak chenna Chin State khawpui Haka chu tlawhpawh theih lovin a awm mek tih a sawi a. Mizoram State sawrkar chuan theih ang anga tanpuina hna a thawh bakah mipui mimir intelkhawmna tlawmngai pawl tam takin Aizawl khawpui leh khawpui dangah te vehbur khawnin tanpuina tur kawng an dap mek thu a Prime Minister a hrilh.

Chhiat tawkte tanpui kawnga thilphal leh khawngaihna ngah India sawrkar chuan Nepal ram a tanpui ang bawk khan kan ram thenawma chhiat tawk mek Myanmar tanpui tur hian Chief Minister chuan India Prime Minister Pu Narendra Modi chu a ngen a ni.