Chief Minister Pu Lal Thanhawla chuan vawiin khan Lengpui a Govt. Fish Seed Farm ah sangha chaw siamna, Fish Feed Mill a hawng.

Chief Minister chuan sangha chaw siamna Mill hawn a ni chu Mizoram tan rahbi thar a ni tiin, sangha chaw siamna tur hmanrua, a raw materials tam tawk neih reng a pawimawh hle dawn a ni a ti a. A chaw siamna hmanrua hi Mizoramah thahnem tak a awm a, hman tangkai hle kan tum a ngai ang a ti a. Phai lam atanga kan chawlut anih chuan a tangkai tur ang leh a hlawk tur angin kan chhawr thei lovang a ti.

Chief Minister chuan sangha khawi hi eizawnna pawimawh tak a tling tih sawiin, sorkara innghata, hlawh la nih ai chuan mahni ke ngeia din chhuah hi a hlu zawkin a zahawm zawk a ni a ti a. Chuvangin kuthnathawh hi kan hreh tur a nilova, khawvela hna zahawm ber a ni tih kan hriat a tha a ti a. Tuna khawl hawn tak pawh hi a nihna tur ang taka kan chhawr tangkaina turin leh a hlawk thei ang bera kan hman theih nan rinawmna, taimakna, dikna, Pathian tihna nung leh takna a pawimawh hle dawn a ni a ti.

Sangha chaw siamna Mill hawn pah hian sangha khawitu, fish farmers te tan training buatsaih nghal a ni a.Chief Minister chuan hetiang ruahmanna siam a ni chu a lawmawm takzet a ni tiin, training tur farmers te chu training buatsaih anih chhan hria a, kan zavai atana tangkaipui tur leh chhawr theih a nih na turin uluk taka training chu kalpui turin a chah a ni.Chief Minister chuan kan thlen chin zel atanga ngaihtuahna thar nen, midang nghenchhan lova mi te tana malsawmna ni turin hmasawn chho zel tur kan ni tih hre reng thin turin a chah bawk a ni.

Heng training nei, mi 24 te hi district hrang hrang atanga thlante an ni a, sangha enkawl dan leh khawi dan kimchang zir turin naktuk hian Tripura a sangha khawi leh enkawl dan hmunpui tlawh turin Kumarghat an pan dawn a ni.

Khualzahawm Dr.B.D. Chakma, Minister of State for Fishery chuan sangha chaw siamna khawl awm ringawt hi a tawk lova, a pawimawh ber a raw materials neih reng hi a tul dawn a ni a ti a. Khawl hawn ani chu department tan ke pen chhuahna ni a ni a ti a. Sangha khawitu fish farmers te hlawhtlinna chu keini tan lawmna a ni a, an hlawhtlin loh erawh chuan min ti lungngai thin a ni a ti.

Fish Feed Mill hi RKVY Programme hnuai atanga din a ni a, Mizoram hmun hrang hrang Kolasib, Bilkhawthlir, Lunglei leh Saitual-ah te din a ni tawh a. Vawiina hawn tak Lengpui ami tih lohte hi chu Public Private Partnership (PPP) mode a kalpui an ni. Lengpuia Mill hi Rs.19.19 lakhs senga din a ni a, khawl bunte hi Disintegrator, Pulverizer, Mixture, Food Extruder leh Hot air drier te an ni. Nitin sangha chaw 200 kg siam chhuak thei tura ngaih a ni.

Training pekte hnenah hian subject hrang hrang Pre-stocking management, Induced breeding of carp, Post-stocking management, Harvesting and preservation of fish leh Disease & Control tih ah te zirtir an ni.

Hawnna inkhwm hi Pu Thlamuana, Secretary, Fishery Department, Govt. of Mizoram in a kaihruai a ni.