Mizoram ramri depa awm, Myanmar Zohnahthlak ten Chief Minister Pu Lal Thanhawla chu Pathian malsawmna leh Zoram mipuite duhsakna avanga Chief Minister tum nga ni theia thlan tlin anih lawm saka, amah chawimawi na an buatsaih turah tel ngei turin an rawn sawm.

Myanmar-a Zohnahthlak chenna khua pahnih Salachhuah leh Vuangtu khawtlang hruaitute, Cezua Ochozhmu, Salachhuah, Ralie Village leh Vuangtu Village, Thantlang Township, Chin State, Myanmar-a Head of Administrator te chuan he chawimawina an buatsaih tur hi Chief Minister Pu Lal Thanhawla chu an rawn hriattir a. Salachhuah khuaah hian  ni 9.5.2014 khian lawmpuina leh chawimawina hun hi an hmang ang a, an khaw chhehvel Khaikhy, Khengkhawng leh khaw dang atangte in an tel dawn bawk a ni.

Vuangtu khua leh a chhehvel khaw 22 a zohnahthlak mipui ten ni 12.5.2014 khian Vuangtu khuaah chawimawina hun hi an hmang ve thung ang.

Heng khua pahnih hruaitu, head of administrator-te hian Chief Minister Pu Lal Thanhawla chu Zofate Hotu nih tling, Chief Minister tum nga ni thei ani hi lawmpui tlak leh chawimawi phu reng a ni tih an tarlang a, lawmnaah hian Pu Lal Thanhawla thawhpui zawng zawngte an sawm tel bawk a ni. Chief Minister Pu Lal Thanhawla chuan an sawmna chu zahawm tiin, tih puitlin sak ngei a tum a ni.