He thu hi PHED Minister Pu Zodintluanga'n Vawiin chawhnu khan Vanapa Hall ah PHE in buatsaih, 'Tuisem chungchanga infuihtharna' programme neih tak ah sawi a. PHED hnathawk 99% te chu inpe zo em em leh rinawm taka hnathawk an awm tih a ring tlat a. Hetih lai hian mitlem te thamna la thin, mi tui chan ai mi thilti thei deuh leh lo tham mai duhtute hnena pe mai thin a awm tih report a awm a. Mi tlem te rinawmlohna avanga department pumpui hming a chhiat erawh a remloh thu a sawi.Thil ti sual tute chu hriat chhuah an nih chuan ngaihthiamna awm lova an hna tih tawp sak a tul dawn a ni ti.
PHED buatsaih Programme hman tak hi, Aizawl khawpui chhunga Juniour Engineer chin hnuai lam zawng zawng, tuisem,counter duty, meter checktute leh tuisemna a inhnamhnawih zawng zawng te tana buatsaih a ni. Minister hi PHED Parliamentary Secretary Pu Hmingdailova Khiangte in tawi awm in Chief Engineer Er.Lalmuanzova'n programme a kaihruai a ni.
He hunah hian Tuisemna a inhnamhnawih hnathawktute thukhawchang leh rawtna te bakah an harsatna thenkhat te ngaih thlak a ni a. Rawtna tam ber ah chuan tuna SIPMIU hnuaia hman mek KRANTi company siam Tui meter chu thlak a tul thu tarlan a ni a. Tuisem tute chuan Pathianni a tuisem chu an huphurh vang nilovin a lo dawngtu mipui ten inkhawm te an lo duh thin a vangin a remchang lo hle a, thuneitu ten ngaihtuah nawn leh se an duh thu an sawi a. Tuisemna ti khaih lak zawnga VIP an tam lutuk te pawh enfiah turin thuneitute an ngen bakah Officer ten tuisemchhuahna hmun pawimawh ah vil tam deuh se an duh thu an tarlang bawk.
Thusawina hun hmang tu PHED Minister Pu Zodintluanga chuan sawrkar hna thawk zawng zawng a te bera atanga a lianber ber te bakah thawk nghet leh nghetlo te chena kan hriat reng tur chu mipui vanga hna nei leh thawh tur nei kan ni tih hriat hi a ni a ti a. Mipui tana thawktute chuan mipui vuivaina te leh harsatna siam zawnga hna thawklov hram tur leh hawihhawm tak, dawrnuam leh rawn tlaka thawk tur a ni a ti. He tih lai hian tuisemna kawnga hnathawktu te hah zia leh thawhrimna te hi mipui te pawn kan hriatpui a ngai ve a, chu chuan hnathawkte ah pawh phurna nasa tak a pe thei a ni a ti a. Tuisem khaihlak thut thut vangte a tui indaihlohna awm thin te pawh inhrilh lawkna fumfe a awm thin loh vanga sawiin Engineer te paw'n communication system felfai tak, tui a lo harsat dawn pawha, mipuite an lo inlawkna tura puanchhuahna a rang lama an siam vat a tul a ni a ti.
Thusawitu dang Parliamentary Secretary Pu Hmingdailova Khiangte chuan mahni hna thawha tui chu kuthnu mam neihna a nih bakah thawhchhuah a hlawk bik a, fak an hlawh thin a ni a ti a. Uluk tak leh phur taka kan thawh chuan midang tan hmasawnna kan nih piah lam ah malsawmna kan ni theuh thei a ni a ti.
