Tukin zing khan Home Minister Pu R Lalzirliana leh AH & Vety. Minister Pu C. Ngunlianchunga te chuan AH & Vety Department-in AH & Vety Complex Thingsulthliah a Mizoram-in vawk note lamah intodelhna atana Vawk Farm RKVY sum hmanga din tur chu a hmunhma an tlawh.  Minister pahnih te hi AH & Vety. Department Director Dr. L. B. Sailo leh a thawhpui ten an tawiawm a ni.

Home Minister Pu R. Lalzirliana chuan Mizoramin vawk note lama a intodelh theih nan leh ram in vawk chi tha leh hrisel a neih theihna atan AH & Vety. Department in Vawk Farm, vawkpui 200 lai dah theihna tur din an tum chu a phurpuiin a lawmpui thu a sawi a.  He ruahmanna hian NLUP an tih changtlun theih a beisei thu sawiin nakin lawkah a hlawhtlinna kan hmu dawn a ni a ti. AH & Vety Minister Pu C. Ngunlianchunga chuan he Farm hi tunlai thiamna te hmanga din tum a nih thu a sawi.

Vawk Farm vawkpui 200 dah theihna tur ‘Establishment of 200 Sow Unit’ hi Rashtriya Krishi Vigyan Yojana (RKVY) sum hmanga sak tur a niin a Farm sak hna hi tun atanga hun reilo tea tan tum anih thu leh kum hnih chhung chuan zawh tum anih thu AH & Vety Department hotu te chuan an sawi.

Mizorama vawk note indaih lohna a nasat avangin ram pawn atangin vawk leh vawk note lak luh reng a ni a, heng ran lakluh atangte hian vawk natna hri lengin Mizorama vawk awmsa pawh a suat nasa hle a, he indaih lohna phuruk nan te, ramin vawk chi tha leh hrisel a neih theih nan te leh NLUP tih changtlun nan he Vawk Farm hi din tum a nih thu, AH & Vety Department hotute chuan an sawi a. He Farm hian Mizoram a vawk note mamawh za zelah 30 vel chu phuhruk thei beisei niin kum tin vawk note 4800 vel a thar chhuak thei dawn a. He Farm atan hian vawk chi tha ram pawn atanga lak tum a ni, he project  hi cheng nuai 470 senga din tur a ni.