Transport Minister Pu John Rotluangliana chuan nimin khan Vairengte-a Transport leh Supply Department check gate te a tlawh a. An nitin hnathawh dan tihphuisuina tur leh an mamawhte a enpui.

Transport Department hian Vairengte-ah hian weigh bridge dah a tum a, a hmun tur mimal ram remchang lei a tum mek a ni. Mizoram-a bungraw phur motor-ten an rawn phurh luh zat hi a tehna a awm loh avangin lirthei atanga chhiah hmuh hi mumal zawka kalpui tum a ni a, chhiah chawi zat pawh hi ennawn tum a ni. Tin, Supply Department check-gate-a duty te pawh Mizoram mamawh rawn phur luttu LPG leh buhfai motor-ten Mizoram chhung an rawn luh hun mumal taka ni tina Aizawl-a report an pek dan tur te a ruahmanpui a. Computer leh fax khawl an mamawhte chu Minister hian a pe nghal a ni.

Pu John Rotluangliana hian Silchar-a Transport Department hmun a tlawh a, he hmun cheibawl dan tur leh mipui leh sawrkar tana chhenfakawm thama siam dan tur department hotute nen an ruahman a. Mikhual thlenna tura ruahman sa cheibawl dan tur leh MST Bus service dan turte an ruahman nghal a ni.