Vawiin khan Mizoram Youth Commission (MYC) Chairman Dr. Vanlaltanpuia chuan a Pisa thar Mizoram New Capital Complex (MINECO)-ah Pathian hnena hlanna neiin, a luah tan.

MYC Chairman Dr. Vanlaltanpuia chuan Pathian lal ber tura a duh thu sawiin, thalaite mamawh hriaa sawrkarin MYC a din chu lawmawm a tih thu a sawi a. Mizo thalaite chu a hnam anga lak pawha Pathianin changkang taka a siam an nih thu leh Sports, Music, Academic, Entrepreneurship, Nursing leh Hospitality leh thiamna dang tam tak an neihte chu hnaah leh pawisa-a chantir a, ram economy sanna tur atana hmalak a pawimawh thu a sawi a. IAS engemawzat chherchhuak tur leh India rama Institution tha tak taka Mizo thalai tam zawk an luh theihna tur atana MYC hmalakna chu nasa taka tih chak anih tur thu a sawi bawk a ni.

MYC Chairman Dr. Vanlaltanpuia chuan MYC chu thalaiten chawei thlenga an hman theihna tura chhuah an tum tur thu a sawi a, MYC hmalak tawh sa leh hmabak te tih zauh a nih tur thu sawiin he dinhmun luah tura mawhphurhna petu Chief Minister chungah lawmthu a sawi bawk a.

MYC Chairman a nihna anga a office luah ni a  amah tawiawmtu Ministers, MLAs, MJA leh a chhungte leh lainahnaiten an tawiawm avangin lawmthu sawiin, MYC-a Officials leh Chairman lo ni tawhte chungah lawmthu a sawi bawk a ni.