Vawiin chawhnu khan Art & Culture Minister Pu R.Lalzirliana chuan Ni thum awh (9th - 11th, July) 10th Umang Festival (Vohbikte Kut), Pi Zaii Hall, Synod Conference Centre, Aizawl a buatsaih chu kharna hun hmangin, Khuallian a ni a. He Kut hi North East Zone Cultural Centre (NEZCC), Dimapur leh Art & Culture Department tangkawp ten an buatsaih a ni.

Art & Culture Minister Pu R.Lalzirliana chuan Vohbikte chungah leh school hrang hranga zirtirtute hnenah lawm thu a sawi a.  Vohbikte'n Umang Festival a an thiamthil hlu leh nalh tak tak an phochhuak thei chu lawmawm, a ti a. Minister chuan tun hma chuan Vohbikte chu nuihzat leh biak nawmnah an hlawha, tunah chuan mithiam enkawlna hnuaiah leh kaihhruaina hnuaiah thil tam tak an zir thei tawh a, eizawnna pawh a then te chuan an nei tawh a ni, tiin a sawi.

Umang Festival kharna inkhawm hi Art & Culture Department Director Pu R.Hmingthanzuala'n a kaihruai a; Archivist & Camp Director Pu F.Lalthanmawia'n report tawi a pe a. School hrang hrang te hian Special Item an nei a;  Ephatha School, Vaivakawn chuan Zaiin mipui an awi a; Shalom Special School, Serchhip chuan lam an entir a; Gilead Special School, Aizawl te chuan Chheihlam an entir bawk a ni.

Umang Festival hi India hmarchhak state hrang hranga neih tura ruahman a ni a, tun kum ah hian workshop buatsaih a ni a, workshop-ah hian  Soft Toys (Sangha lem, Ice cream, Zawhte, Sava lem leh Naute lem) pakhat theuh siam a ni a, hei bakah hian Project Work atan an duhber milem pakhat an siam bawk a ni.

Umang Festival ah hian School pathum an tel a;  Gilead Special School, Aizawl atangin 10, Shalom Special School, Serchhip atangin 10 leh Ephatha School, Vaivakawn atangin 10 an tel a ni. Mi 30 tel zingah hian mipa 8 leh hmeichhia 24 an ni.