2509/2024-2025
Aizawl, the 14th October, 2024: Vawiin dar 1:00 pm khan MYC Chairman-in West Impress- State level Workshop- Innovative Education Aligning Mizoram Curriculum with Future Career Opportunities tih Government Aizawl West College buatsaih chu a auditorium GAWC-ah a hman pui.

Zirtirtu, zirlai leh mithiam lo kal te hnenah Pu Malsawmzuala Ralte, MYC Chairman chuan University syllabus chu NEP hnuaia duan vek a nih avangin kut them thiam, eizawnna tan a tangkai tur pawh syllabus-ah hian zeh tel a nih thu a sawi a. Chu chuan eizawnna tak tak hna kan dapna-ah min pui thei dawnin a sawi a ni. Thalai lo kal khawm te chu T-5 formula ti ve turin a chah a- Taimakna, Tumruhna, Teirei peihna, Time Table. MYC hmalakna hrang hrang a sawi chhun zawm a. MYC chuan Honda India Foundation leh Visan Foundation te tangkawpin Project Buniyaad Hospitality Management Training Course neih mek a ni a. Heta training chhuak te hi India ram Hotel lianah te an thawk nghal dawn a ni. Heng bakah hian Tirupati lama thawk turin Mizo thalai za rual te tirh chhuah an ni dawn a, advertisement te ti chhuak tawhin hei hi hmalak mek zel a ni bawk. Heng bakah hian health sector lamah mai ni lo hna dang tam tak thawhna Japan lama in hawn tak avangin NSDC nen thawhho na tur sawi tawh chu a hmun en thli thali turin chairman pawh a kal thuai tur thu a sawi a. Mizoram chhungah pawh coaching centre- Aizawl, Lunglei, Saiha, Serchhip-ah te neih mek a ni a. Kolasib lam pawh hawn leh thuai tum a ni. Hengah hian Group A leh B coaching te neih mek a ni a. Mi 500 chuang he coachingah hian an kal mek a ni. Mission UPSC (Taitesena) pawh chak taka hmalak zel a ni a, rah tha a chhuah vat beisei a ni. Mandarin tawng zirturin Mizo thalai pahnih tirh mek an ni a. Hemi te hian an lo haw hunah Taiwan-a Mizo hnthawk duh te tawng an zirtir thung ang. Tawng a pawimawh avangin Centre of Excellence for Language Learning- tawng zirna hmunpui din tur a hma an lak mek thu a sawi bawk. Kan state tan pawh human resource kan neih hi kan rohlu ni a sawiin, India ram hmun hrang hrang bakah khawchhak lam Japan, Korea, China ram te kan thalai te’n an dai dar dawn a ti a. Chutiang tur chuan chak takin MYC hian hma a la mek a ni a ti.

He programme-ah hian Prof. Lalbiakdiki Hnamte, Working chairman Mizoram Education Reforms Committee mai bakah Dr. B. Lalzarliana, MZU, Alan Lalhriatpuia, CEO Lailen Pvt. Ltd te’n sawihona an nei a. Hnathawh tur tangkai zirna kan kal pui dawn chuan a thu hla ringawt zirchhuak lo in a tih a tih (experimental) a kan kal pui a pawimawh a. Zirlai hriatchianna tur chuan mahni tawng ngei a kan zirchhuah a ngai a ni. Chumai bakah khawtlang in kan thlirna tlang pawh kan sawi dang lam a ngai a. Marking system ringawt hian atak ramah thiamna tak tak min pek loh avangin “a tih a tih” a pawimawh. Khawvel danglam dan a zirin hnathawh tur pawh a danglam zel a, chumi avang chuan kan zirlai leh kan zirdan pawh in hre rem zel a ngai bawk.

He programme hi Dr Janet Vanlalhlimpuiin kaihruaiin keynote address Dr. Lalremruati te’n an sawi bawk. West Impress programme hi Social issues, Political issues leh Policy te a mithiam te sawihona a ni a. Remchang a piangin College hian a huaihawt thin.