2508/2024-2025

Dated Aizawl: the 14 October 2024 : Vawiin chhun dar 12:00 khan Pi Lalrinpuii, Tourism Minister chuan a office chamber-ah Sialsuk khawtlang hruaitute chu ‘Best Tourism Village - Community based category’-a  India ram pumpuia lawmman an lak lawmpuiin thingpui inhona a neihpui a. Minister hi Dr. Lalrozama IAS, Secretary, Tourism Department leh Tourism Department officer-te'n an telpui a ni.

Lawmpuina hun ah hian Minister Pi Lalrinpuii chuan Sialsuk khawtlang hruaitute lawmpuina leh fuihna thuchah sawiin, ram pum huapa lawmman dawng thei khua an ni chu a chhuan tak zet thu a sawi a. Sialsuk chu khaw nuam tak leh khualzin hip thei tur hmun mawi leh nuam tak tak tamna a ni tih tarlangin, Sawrkar pawhin theihtawp chhuah a chung hmunte chu a vilpui ve tur thu a sawi a. Lawmman dawng thei tura khawtlang mipuite inpekna pawh fakawm a tih thu sawiin, khualzin hip tur chuan thil dang zawng aiin a hmuna cheng mipuite chu an pawimawh thu a sawi a. Khawtlang hruaitute chu an khaw hmun hlute vawng him a an hmalakna entawn tlak tak takte chu chhunzawm zel turin a chah nghal a ni.

He hunah hian Sialsuk VCP  Pu R.Lalruatkima chuan Best Tourism Village an nih theih dan report a pe a. Tourism Department hruaitute atangin Dr.Lalrozama IAS chuan Mizoram tana Tourism pawimawhna te, thalai tam tak eizawnna pe theitu a nih dan  te a tarlang a. Sialsuk khua in Community based category-a best tourism lawmman an dawng chu Mizoram nen a inhmeh a, khawtlang leh Department  thawhhona that zia a tarlang hle a a hriat thu a sawi bawk a ni. 

Sialsuk khua hian Community-based category-a Best Tourism Village Awards 2024 chu 27-Sep-2024 khan  India ram Vice President leh Union Minister for Tourism and Culture-te hnen atangin  an lo dawng tawh a. Hemi pual a vawiin a hun hman ah hian, Sialsuk khua a tourism tihchangtlun zel dan turte sawiho nghal a ni.