No.3808/2020-2021

Gov't Hnahthial College, Auditorium-ah vawiin khan 'Consultation & Workshop on Skill Development Framework: Hnahthial District’ buatsaih niin Mizoram Youth Commission Chairman Dr.Vanlaltanpuia MLA chuan khuallian niin a hmanpui a, "ramin hma a sawn dawn chuan a mamawh leilung mil policy neih that a ngai a ni" ti.

Pu K.Lalsangluaia, Principal, Govt Hnahthial College kaihhruai inkhawmah hian MYC Chairman Dr.Vanlaltanpuia chuan Human resource development lamah Mizoten tan kan lak a tul thu sawiin "Zofate hian thiamna theihna kan nei tha a, chu chu kan infiam mite leh zaimi ah pawh a lang chiang em em a, engkawng pawh han zawh hlek ila kan ti thei mai zel a ni. Zirlai lehkhathiam leh nunchang tha tak tak pawh an tam tawh laiin hnathawh tur an nei si lo hi an harsat a ni a, chumi tih rehna tha ber chu Skill development kalpui hi a ni a, Mizo nula leh tlangval ram pawn a hnathawkte avangin Mizoram-ah thla tin cheng Vbch 4 vel a lut thin a ni" a ti. Thil te tak te a kan ngaihte hi kan mamawh tak a nih thin thu sawiin Dr.Vanlaltanpuia chuan "kan rama hnam dang vai awmte an han haw meuh chuan Cement Mistiri kan mamawh zia a lang a, kan thalai fel tak takte hian thawhhreh nei lovin kan ram mamawh hi an hmuh thiam a ngai tak zet a, hmasawnna dik chu a hniam atangin a sangah a kal thin a ni" a ti bawk.

Keynote address sawitu Hnahthial District Bawrhsap leh Chairman, Core Team on Skill Development Framework ni bawk Pu Vanlalmawia chuan "Covid-19 hrilengin mi tam tak eizawnna tibuai-a harsatna a siam mek lai hian Hnahthial district-a thalaite leh kuthnathawk tu ten eizawnna kawnga hma an lakna tanpui turin ‘Skill Development Framework : Hnahthial District’ chu kalpui tura ruahman a ni" a ti.

He hunah hian Pu Vanlhnema, Member of Higher & Technical Education Board pawhin thu a sawi bakah Agriculture leh a kaihhnawi te, Industries leh Services chungchangte chu mithiam hrang hrang ten kalkhawmte an zirtir nghal bawk a ni.

‘Skill Development Framework : Hnahthial District’ ah hian Member 9 awmna Core Team chu District bawrhsap Chairman-na hnuaiah din fel tawh niin Committee hian Partner Institute atan heng te hi a ruahman bawk :-

1. Govt. Hnahthial College (Entrepreneurship Knowledge Centre).

2. Krishi Vigyan Kendra (KVK) Lunglei District, Hnahthial.

3. Integrated Training Centre / School of Agriculture Science.

4. Extension Training Centre (ETC), SIRD, Lunglei.

Attachment

  • Loading attachment...