Mizoram Youth Commission Governing Board chu an Chairman Pu Hmingdailova Khiangte hovin a pisaah vawiin chawhnu khan an thukhawm.

MYC Governing Board thutkhawm vawi 10-na ah hian kum hmasa lama an hnathawh thenkhat te thlir let pahin kum 2013-14-a an hnathawh tur hmachhawp tihhlawhtlin dan tur te an sawi hova. An hmachhawp zingah hian ramchhung hmun hrang hrang mai bakah Singapore leh khawvel hmundanga Mizo thalaite hna zawnsak te; Civil Service Coaching Class tharthawh leh te; hnazawn kawnga zirlaite puitu Career Guidance buatsaih te; High School/Higher Secondary School-a Quiz Club din te a tel a ni.

Sokar leh mimal eizawnna leh hmasawn tuma India ram chhung hmun hrang hranga kal velna tih awlsam nan Hindi, Bengali, Assamese, Marathi leh tawng dang Mizoram mipui ten an thiam theihna tura Indian Language Institute & Skill Development Training Center Muallungthu a din tum chung chang pawh he meeting-ah hian an sawi lang a. Hei bakah hian Mission Foundation Movement, Bawngkawn nena thawk hova, Mizoram mipui leh thalaite a tam thei ang ber eizawnna siam sakna atana Community College panga tal din te pawh an sawi tel a ni. Community College hi college dang aia a danglamna chu industry, establishment leh khawtlang nen thawhho a tul a, a course kalphung a danglam a, hna hmuhna (placement) lam a kawkin a tul anga her rem theih a ni a, mi rethei leh chanhaite tinzawnin thalaite thiamna chher hriam a, eibar zawnna kawngah remchanna a siam sak dawn a ni.