Vawiin khan Armed Veng ‘S’ MHIP Building sak thar chu Khuallian Home Minister Pu R.Lalzirliana’n a hawng a, he hunah hian Education Minister leh Bialtu MLA ni bawk Pu Lalsawta chu Khualzahawm chan a chang a ni.

Building thar hawnna inkhawm Armed Veng ‘S’ MHIP President Pi Chhawnthangi kaihhruaiah Pu R.Lalzirliana chuan MHIP chu ram tan rohlu a tling a, inngeih tak leh lungrual taka an thawh chuan veng, khua leh ram thlengin hmasawnna tam tak a hmuh phah thin a ni, a ti. Vawiina MHIP building thar hawn tak chu MHIP tan chauh ni lo, khawtlang leh mipui zawng zawng tan tangkai taka hman theih ni se a duh thu a sawi a. Mizoram chhunga cheng zawng zawngte inlungrual taka kan awm hi kan chakna a ni a, mite tan rawngbawl thei nun neih chu kan tum theuh tur a ni, a ti bawk.

Khualzahawm Pu Lalsawta pawhin thu sawiin Mizote nun thlirin vawiina kan hmasawnna hian kan hmaa kal ta min thlatute let tam takin kan khumin kan pel ta niin a lang a, hei hi a tha zawnga hmasawnna kan nei rah duhawm tak a ni, a ti. Pu Lalsawta chuan Mizo hmeichhiaten hamthatna leh hmasawnna rahbi tam tak an nei zel chu a lawmawm a ti a; amaherawhchu hmeichhiaten pasal an nei a, an thuamchhawm thin chu tih tawh loh a that zawk a rin thu a sawi. MHIP member kalkhawmte chu fuihin Minister chuan kan fanau rochan te hi mahni chhungkua tan chauh ni lovin khawtlang leh ram tan mi pawimawh leh tangkai ni thei tura kan chher chho a pawimawh tak zet a ni, a ti.

Armed Veng ‘S’ MHIP hi kum 1986-ah din tan niin, vawiina MHIP Building an sakna hmun hi kum 1989-ah an lei tawh a ni. Member-ten tangruala taka building sakna tur sum an tuak bakah MP (Lok Sabha) Pu C.L.Ruala’n MP Fund atangin cheng nuai 5 a pek hmanga sak a ni.