Mizoram Rural Bank (MRB), Branch 68-na, MRB Seling Branch chu vawiin khan Home Minister Pu R. Lalzirliana’n a hawng a, hemi hnu hian bank hawnna puala inkhawm tawite YMA Run, Seling-ah neih lehnghal a ni.
Pu R. Lalzirliana chuan Mizoram Rural Bank hi thingtlang miretheite dawmkanna tura din a nih rualin khawpuia mi harsa zawkte tanpui hna pawh an ngaihthah chuang lo a ni, a ti a. Mizoram-a Bank awm zingah phei chuan Branch ngah ber niin RD Block zawng zawng an tuamkim tawh a, chuvangin Huapzo Bank tih pawh hi an inhmeh viau thu a sawi a.
Home Minister chuan he bank hi a ram mite chhawr leh ban phak, a thawktute pawh a ram mi ngei an ni a, chu chu a hlut em em na pakhat a ni a ti bawk. Home Minister chuan thingtlang miten Bank hlutna an hriat telh telh a tul a, bank pawimawhna hre tur pawhin zirtirna pek fo a ngai thin a ni tiin mipuite tana awlsam, hun tihek lo zawnga kal dan zawn zel pawh hi thil tul tak a ni a ti bawk. Hetih rual hian Sawrkar hriatpuina lova din, bank lem te hian kan hnam an run mek a, mi tam takin an in leh lo an chan phah tawh a, chuvangin hetiang bank rinawm loh lakah mipui kan fihlim a tulin kan fimkhur a ngai a ni a ti a. Sawrkar hriatpuina leh Reserve Bank phalna nei thlapa bank din ah te hian a pung chu vawileh khata tam lutuk ni lo mahse heng bank te hi chu a him in, sum tlem tlem a khawlna tha tak anih mai bakah pawisa hlohna te pawh a awm loh thu a sawi bawk.
Pu R. Lalzirliana chuan MRB leh Mizoram sawrkar inkarah inlaichinna leh thawhhona tha tak a awm a, thingtlang leh khawpui hmasawnna rualkhai tak a awm theih nan Bank hnathawh kawngah Sawrkar pawhin a theihna kawng apiangah a tawiawm tur thu a sawi. MRB chu Mizo mipuite tana bank dawr nuam leh manhla, mitin huap anih thei nan sumdawng rilru aia mipui rawngbawltu nihna rilru dah pawimawh zawk turin MRB thawktu te chu a chah bawk a ni.
Bank hawnna puala inkhawm YMA Run Seling-ah neih hi Pu F. Lalhmangaiha, Senior Manager (Accounts) in a kaihruai a, hunserh Pastor R. Lallianpara’n a hmang a. Pu C. Lalrinliana Manager (NPA, IOR) chuan MRB hnathawh leh an hmalakna tlangpui a tarlang a, Seling VCP Pu Pu Raymond Lalbiaknunga leh Seling Branch, YMA President Pu Lalhleia pawhin thu an sawi bawk a ni.
Vawiin vek khan MRB Branch 69-na, Saiha Vengpui Branch chu MADC CEM Pu R T Zachono’n a hawng a. March ni 11 khian Chief Minister Pu Lal Thanhawla chu MRB Branch 70-na, Falkawn Branch hawng tura beisei a ni. MRB hi September ni 27, 1983 khan din tan a lo ni. Nikum chung khan MRB hian khawtlang rawngbawlna – Corporate Social Responsibility kaltlangin, Home leh nau hnuchham enkawlna pasarih ah te cheng 80,000 theuh a hlan a; CYMA hnenah mithi phurhna Morgue Van cheng nuai 6 man an hlan a; tun Chapchar Kut hmanna ah khan cheng 70,000 an thawh bawk.
Nikum vek atang khan MRB Branch zawng zawng te hian Sawrkar High School a Pawl XI zirlai pahnih (mipa leh hmeichhia pakhat ve ve), chhungkaw harsatna avanga mahni zirna bansan dinhmun a dingte chu Pawl X an pass thleng an zirna man an tumsak mek a a ni.
