No.597/2021-2022

Aizawl the 20th May, 2021 : MYC Chairman leh Lungei North bialtu MLA, Dr.Vanlaltanpuia chuan tukin khan Aizawla tangkhang mek a bial chhung Zote South Nula tlangval mi 10 rual zette chu a Motor-in an khaw lamah a thawn haw a. A bial chhung Ramlaitui khaw nula Elizabeth Lalnunzami Covid-19 Positive avanga BSUP Building Durtlanga awm mek chu a tlawh bawk a, ani hi Bawngkawna a chhungte damlo enkawl tura lokal a ni a, tui thianghlim in tur leh ei tur engemaw zat a pe nghal a ni.

Hemi hnu hian Dr.Vanlaltanpuia hi an chenna veng LLTF Khatla duty leh Bungkawn LLTF Duty-te chu Er.H.Lalzirliana Mamit bialtu MLA nen tlawh lehnghalin Khatla LLTF hnenah Rs.5000/- Hand Sanitiser leh Facemask-te chu pein Bungkawna LLTF Duty-te pawh Rs.5000/-, Hand Sanitiser leh Facemask an pe bawk a ni.

Hengah te hian Dr.Vanlaltanpuia chuan thu sawiin tunah hian Covid-19 Second Wave chuan India ramah a vanglai a tleh chho mek a, Mizoramah pawh mi 2000 chuang zet vei mek, enkawl lai kan awm a. Chief Minister, Health Minister, Minister leh MLA-ten an bial theuh tan leh Zoram pum tan mutmu pawh tuah hman lovin hna an thawk a. Heng hmalakna tam tak karah hian thahnemngaih avanga engemaw an dai sual palh lo chang ran kan awm thinte hi sim tawh ang u. Covid-19 hi a ram pum ang leh hnam anga tangrualin i do tlang ang u. Hun harsa leh hun khirh kan tawh lai hian Lockdown vangin nitin eichawp zawng khawsak harsa tak tak an tam a, mi khawsa thei leh nei nung zawkte pawh midangte tana luangchhuak turin ka ngen nghal bawk che u a ni. Party mal ngawt emaw, sorkar leh LLTF/VLTF ang chauha do hneh chi a ni lo a. A ram mipui tangrual i la, tha thlah lovin damlo tan leh thawktute tan i tawngtai mawlh mawlh ang u tiin a sawi.