No.596/2021-2022

Aizawl the 20th May, 2021: Vawiin ni chawhnu khan Mizoram Sawrkar tana High Powered Committee chu jail tangte Covid19 hrileng laka an him theihna ngaihtuahin an Chairman Justice Michael Zothankhuma, Judge, Gauhati High Court hovin an thu khawm.

Supreme Court of India chuan Suo Moto Writ Petition (C) No. 1/2020-a thupek a chhuah angin India rama State tin leh UT tinte chu COVID-19 virus leng vel karah India rama Jail tang zawng zawngte he hripui hian a luhchilh lohna tura hmalatu tur thuneitu sang High Powered Committee din vek turin a ti a. Chu thupek bawhzui chuan Mizoramah pawh High Powered Committee din a ni a. Justice Michael Zothankhuma, Judge, Gauhati High Court leh Executive Chairman, Mizoram SLSA ni bawk chu Chairman atan ruat niin, Committee member te chu Pi Lalbiaksangi, Secretary, Home Department; Pu Lalnunhlua, IGP (Prisons) leh Pu R. Vanlalena, Member Secretary, Mizoram SLSA te an ni.

HPC hian Jail hrang hranga jail tang mekte chu he hripuiin a luh chilh lohna atan kawng hrang hranga hma lak dan tur an rel zinga langsar zualte chu hengte hi a ni –
1) Jail tang mekte himna tura Health Services pek te;
2) Jail tang thar turte Covid-19 hri an kai leh kai loh endik hmasak te;
3) Tun boruak khirh laia jail tawt lutuk te tihziaawm nana bail-a chhuah theihte endik chungchang te;
4) Court-in thiamloh a chantir tawh jail tangho dan hmanga remission leh parole pek te;
5) Damlo na zualte a remchan dan anga condition mumal tak neia chhuahtir lailawk te pawh a tel a, amaherawhchu, pawi khawihna nep deuhte tan bik chauh a ni. Heinous Crime-a involve jail tangte erawh an tel ve lo.
6) He hmalakna atan hian Health Department lamin Jail-a lut thar turte a tul angin RAgt Test District Court Complex-ah an nei thin ang a, District court hrang hranga Judge/Judicial Magistrate-ten anmahni zawn theuhah hmalakna turte pawh tuksak an ni.

Kar hmasa ni 13.5.2021 khan he HPC hi Chairman chenna inah kumin atan thu pawimawh ngaihtuahin an lo thukhawm tawh a. Chuta meeting chuan District hrang hranga jail tang mekte thubuai neih dan chi hrang hrang, jail tan rei tawh chin, convict tawh leh UTP te list an lo khawnkhawm tawh a ni.

He Committee-in a tum bulpui ber chu Jail tang mekte hripuiin a luhchilh lohna tura a tul ang anga hmalak a nih bakah thawktute an himna tura hmalakna pawh a huam tel a ni. Jail tang mekte hripuiin a luhchilha an inkaidarh chum chum tur venna atan jail hi tun dinhmunah chuan a zangkhai thei ang bera awm tir a ngai a; lut thar turte pawh uluk taka test an nih hnuah a pawng a taka jail-a inthawn liam hi tun dinhmunah chuan thil him ber a ni lo thei a ni.

Vawiin meetingah hian member bakah Pu John Laldina, DIG(Hqrs.) leh Pu R.Lalramnghaka, Special Secretary, Health and Family Welfare Department chu Special Invitee angin an tel bawk a ni.