No.595/2021-2022

Aizawl, 20th May, 2021 : Health Minister Dr. R. Lalthangliana chuan vawiin khan Zoram Medical College-a hman tur COVID-19 hri kai boralte ruang phurhna tur "Morgue Van" chu State Bank of India Regional Manager Pu LP Lalchangkima hnen atang a dawng.

Mizoram Secretariat tualzawlah Morgue Van inhlanna hun hi buatsaih a ni a. Health Minister Dr. R. Lalthangliana chuan Mizorama State Bank of India hnuaia thawkte mai bakah Bengaluru (Bangalore) a Mizo SBI officer ten an pawisa thawhkhawma Mizorama COVID-19 hri kai nunna chante ruang phurhna tur "Morgue Van" an lei chu ropui a tih thu leh ram leh hnam hmangaihna thinlung atanga chhuak a nih ngei a rin thu a sawi a. Mizoram tan tia thawhlawm an thawhkhawm chuan a rilru a hneh thu leh Zoram mipuite rilru pawh a hneh ngei a rin thu a sawi a, Mitthi ruang phurhna tur Bolero Pik-Up an lei bakah mitthi ruang phurhna tur atana cheibawl ngai zawng zawng anmahni sensovin an rawn tifel nghal vek bawk a, hei hian hripui dona kawnga an thahnemngaihzia a tilangin, hripui dona kawnga thawktu zawng zawngte rilruah phurna leh chakna thar a pek ngei ka ring a ni, a ti.

Minister chuan ZMC a oxygen siamchhuahna khawl "oxygen generating plant" chhia siamtha tura a siamtu company HOSCO Pvt. Ltd. Kolkata ami te nikum lam atanga an chah tawh, COVID-19 hrileng chhuanlama rei tak lo kal theilo te chu na deuh hleka a nawr thu sawiin, tunkar tir khan a siamtha tu tur engineerte an rawn thlen thu leh an siamthat tawh thu sawiin, vawiin chawhma lam khan enchhinna (trial run) hlawhtling taka neih a nih thu a sawi a. Dr. Thangtea chuan Mizoramah hetiang siam thiam kan neih loh avangin nakina mamawhna kan neih hunah kan buai loh nan Mizorama hetiang lam kawnga hriatna nei tur deuh nia kan hriat techiciante kan sawm a, HOSCO Pvt. Ltd. Engineerte chu kan mite training pe tura cham chhunzawm tura ka ngen angin kan mite training an pe dawn a ni, a ti.

SBI Regional Manager Pu LP Lalchangkima chuan Corporate Social Responsibility hnuaia tih dawn chuan file kalkual hunte a rei thin avangin Mizorama SBI staff-te chuan keimahni pawisa thawhkhawma Morgue Van hi lei mai a tha kan ti a, hetih lai hian Bengaluru (Bangalore) a mizo SBI officerte pawhin Mizoram tan kan rawn thawh ve ang e, an ti a. Mizoramin COVID-19 hripui a dona kawnga kan tangkai ve theihna a nih beiseiin hetiang hian hma kan la a ni, a ti.

Vawiina Morgue Van hlanna inkhawm buatsaihah hian Aizawl South-III bialtu MLA Dr F. Lalnunmawia, ZMC Director Dr John Zohmingthanga leh Health department hotute an tel a ni.