No.594/2021-2022

Dated Khawzawl, the 20th May, 2021 : Khawzawl District Bawrhsap Pu Zothanmawia chuan nimin khan Kawlkulh leh Dulte khuate tlawhin National Highway No. 6 kawng laih dan tur duh lova heng khaw pahnih ten lungawi lohna an lantir mek chungchangah khawtlang hruaitute a kawm.

Pu Zothanmawia chuan National Highway No. 6 kawng laih dan tur Central lamin an tihfel tawh avangin tunah chuan engmah tihdanglam theih a awm tawh lo tih a sawi a. Khaw pahnih khawtlang hruaitute chuan theihtawp chhuahin an duhdante an tilang tawh a, tunah hian tihdanglam theih a awm tawh loh avangin an dinhmun pawm thiam a, harsatna thlen thei zawnga hma la lo turin a ngen a. Thawm neih leh thuchhuah siamte pawhin awmzia a nei tawh lo tih sawiin, tunah hian ngen tur a awm tawh lova, awmze nei lova boruak tihsosan a hlauhawm thu a sawi a. Kawng hi Central Sawrkar sum hmanga thawh tur a ni a, a laih dan tur pawh Central Sawrkar buaipui a ni a, kawng laih tur tha taka tawiawm hi khua leh tui kan nihna anga kan mawhphurhna a ni, a ti bawk.

Khawzawl District Bawrhsap Pu Zothanmawia chuan sawi chhunzawmin, khawtlang hruaitute chuan sawrkar lakah beisei leh duh an nei a nih pawhin an thlensak thei reng a ni, a ti a. Media lama thuchhuah siam a intâwng ang chi te pawh tihtawp a hun tawh a ni, a ti bawk.

Khawzawl SP Pu PC Lalchunglura pawhin thu sawiin, lungawi lohna lantir mekah dan bawhchhiatna a thlen theih dan leh dan bawhchhiatnain nghawng pawi tak a neih theih dante a sawifiah a. Additional DC Pu Lalrohlua chuan khawtlang hruaitute hnenah Land Acquisition chungchanga hriattur pawimawhte a hrilhfiah bawk a ni.

Nimin vekàh Khawzawl DC, SP leh Additional DC te chuan Puilo khua pawh tlawhin, khawtlang hruaitute nen inkawmhona hun an hmang a ni.