Nimin ni 23.10.2019 khan 23rd AMKA State Karate Championship leh AMKA Silver Jubilee (1994-2019) lawmna chu Dawrpui Multipurpose Hall, Aizawl-ah hman a ni a, he hunah hian Mizoram Youth Commission Chairman Dr.Vanlaltanpuia chu khuallian a ni. AMKA State Karate Championship hawnna leh Silver Jubilee lawmna hun hi AMKA Vice-President Pu R. Zomawia, Chairman, Organising Board ni bawk chuan a kaihruai a, AMKA General Secretary atangin Report ngaihthlak chhunzawm a ni. All Mizoram Karate Asociation hian khawvel huapin hlawhtlinna tam tak an lo dawng tawh a, National leh regional thlengin Mizoram tan chawimawina an lo hawn tawh a ni.

Khuallian Dr Vanlaltanpuia, Chairman, MYC chuan an hlawhtlinnaah a lawmpui thu sawiin Pathian kaihhruainaa Silver Jubilee hmang thei tura hlawhtling taka an lo kal tawhnaah AMKA chu chhuanawm leh entawntlak tak a ni a ti. HIV/AIDS in Mizoram a run mek a, Mizoramah ngei he natna  za-ah 20% lai maia tunhnaia a pung hi pawi a tih thu a sawi a, thalaiten hnam chhan nan an nun an uluk a tul tawh a ni tiin, Sorkar ang pawha hmalak a tul tawh zia a sawi a. Karate inkaihhruaina (guiding principle) leh thiltum (objective) tha tak hi Zoram thalaite hian entawn nachang hria se, uar lehzual zawkin kalpui  atan a tha a ni a ti a. Kum 2020 Tokyo-a Olympic lo awm turah Karate hi discipline pakhat a nih tawh tur hi lawmawm a tih rualin, hemi atana AMKA inbuatsaihnaah duhsakna a hlan a. Mizoram tan thil tha tak AMKA hian a ti a, Mizoram tana ke an pennaah MYC chuan a chhawmdawl zel tur leh  support an ngaihna zawnah MYC chu a ding reng dawn a ni tih a sawi a. Harsatna an tawh mek chungchang pawh chak taka hmalakpui a tum thu a sawi a. Chief Minister hnenah an mamawh angte thlen sak a tum nghal thu a sawi bawk a ni. Coaching leh training programme piah lamah, MYC chuan sports promote turin ke a pen dawn a, chung zingah chuan Karate pawh a tel ve a ni tiin MYC Chairman chuan a sawi bawk a. AMKA leh Mizoram Youth Commissin chu thawkho zel tura a duh thu leh, thalai te eizawnna an lo siam tawh na hi chhunzawm zel a, thahnemngai taka Zoram tana ke pen zel turin a duhsakna a hlan. MYC Chairman hian AMKA Silver Jubilee Souvenir a tlangzarh nghal a ni.

23rd  AMKA State Karate Championship-ah hian Mizoram District hrang hrang atangin karateka 310 an tel a. Category hrang hrang - Kids, Sub-Junior, Cadet, Junior leh Senior Category-ah Kata leh Kumite-ah an inel dawn a ni. He Championship leh Silver Jubilee lawmna hi naktuk ni 25.10.2019 (Zirtawpni) kharna hun neih a ni ang.