Nimin khan N.Delhi-a Siri Fort Auditorium ah ramchhung zirlai talent nei tha chherna Pradhan Mantri Innovative Learning Programme 'DHRUV' chu khar a ni a. Zirlai talent nei tha thlan zingah hian Mizo zirlai Lalruatpui, Govt. Mizo High School a tel a ni.

DHRUV kharna inkhawmah hian Vice President M.Venkaia Naidu chu khuallian a ni a, Union HRD Minister  Ramesh Pokhriyal 'Nishank te, Minister of state Dhotre Sanjay Shamrao te, Principal Scientific Advisor Prof K.Vijay Raghavan te leh Secetary Department of School Education Amit Khare te pawh an tel a ni.

Vice President Venkaiah Naidu chuan DHRUV chu zirlai talent nei tha chungchuangte tan an nuna thil thleng pawimawh a tha zawnga kuaihertu, an tuina kawng hrang hranga an theihna pholangtu a ni dawn a ni a ti a.  He programme hian hlawkna leh tawnhriat tam tak a neihtir a, ka lawmpui hle a ni a ti.
   
Union MHRD Minister pawhin zirlai thlan chhuah te chu ramchhunga zirlai vbch 33 zingah tlangchhipa meichher det ang an nih a beisei thu a sawi bawk.
   
Nimin kharna inkhawmah hian zirlai 60 thlan chhuahte chuan a tirah classical music in bul an tan a,  a dawtah vistaar hai aapar tih hla an rem zui a, a tawp berah science student zawng zawng te nen vande maataram hlaah  an lam ho a ni.

He Programme hi Bengaluru-a hawn anih hnuah N.Delhi-ah  hman zui a ni a, India ram hmun hrang hrang atangin zirlai naupang 60, Science leh performing arts atangin 30 ve ve an tel a. Heng zirlai thlan chhuah te hi an talent leh theihna chi hrang hrangte chu mithiam lar tak tak ten an tuaihriampui a, ram tana chhenfakawm khawp thiamna an neih theih nan an enkawl a ni. Mizoram atanga tel Lalruatpuii hi nikum khan National Kala Utsav N.Delhi a neihah vocal female category-ah Mizoram aiawhin a lo tel tawh ni.
    
School Education Dept. Joint Director leh SPD Samagra Shiksha Pu Lalhmachhuana chuan Lalruatpuii hi School Education Minister aiawhin N.Delhi-ah a tlawh a, Lalruatpuii hian vawiinah Aizawl a lo thleng a ni.