Vawiin  chawhma dar 10:30 khan Chanmari YMA Hall Lungleiah  Art & Culture Department Lunglei, Mizo Cultural Artist Association (MCAA) leh Mizoram Independent School Association (MISA), Lunglei tangkawp buatsaih Cultural Festival For Students, 2019 neih a ni. Pu H. Lalthansanga, President MJA Lunglei chuan khuallian niin a hmanpui.

He hun F. Rohmingliana, Principal CMS & President MISA kaihhruaiah hian, Khuallian Pu H. Lalthansanga chuan thu sawiin, Zirlaite puala Cultural Festival buatsaih a ni chu lawmawm a tih thu a sawi a, kan ram leh hnam kan nihna kan vawnhima kan humhalh zelna tur atan kan hnam incheina inbel kan uar deuh deuh leh kan hnam lam kan chin uar deuh deuhte hi a tul a, helam kawngah hian Mizote pawh kan harh thar zel a, sawrkar pawhin sawrkar hnathawkte Nilaini a piangin Mizo incheina inbel tur te'n a ti a, heng te hi kan hnama kan chian thar lehzelna tura pawimawh tak leh hmasawnna lawmawm tak a nih thu a sawi.

Mizo Culture mawi tak Zirlaiteah kan tuh thar a, Aia Upa te zahthiam chungchangah te, Tlawmngaihna chungchangte thangthar ten an chhawm nun zel theih nan zirna inah theihtawp kan chhuah zel a ngai a, Education kan tih hian lehkha zir ngawr ngawr lam ringawt ni lovin, kan zirlaiteah Mizo nun zemawi tak kan tuh zel te leh thil dang tam tak kentel a nei a, chungte pawh chu lehkha zirna ngawr ngawr piah lamah pawimawh tak tak anih thu sawiin, chutiang tur chuan theihtawp chhuah ila, kan ram leh hnam, kan culture hi i vawng nung reng ang u, tiin he Cultural Festival hi a hawng a ni.

He hunah hian MISA Lunglei hnuaia English Medium School hrang hrang 12 te telin Mizo hnam lam hmuhnawm tak tak entir niin, zaithiam zaite ngaihthlak a ni a, Item hrang hrang 23 lai entir a ni.