Asia Pacific Youth Exchange (APYE) Programme, Seoul, South Korea-a Mizoram Team-te chu Dr Vanlaltanpuia, MLA, Chairman, Mizoram Youth Commission chuan a Office Chamber-ah vawiin khan meeting a neihpui a. He meeting hi Chairman, MYC chuan kaihruaiin Mizoram aiawha kal tur zirlai mi 13 te inhmelhriattirna leh he programme atana hriattur pawimawhte sawihona hun hman a ni.

He Exchange Programme-a kal turte hian APYE website-ah application an thehluh hnuah interview hrang hrang an hmachhawn a, uluk taka APYE, South Korea, Delegation Management Team lamin an rawn thlan chhuahte an ni. Heng zirlai thlanchhuahte hi 50% scholarship APYE-in an pe anga, a bak 50% hi MYC-in an tumsak ve thung dawn a ni. University hrang hrang atanga zirlai thiam tak tak thlan an ni. He programme-a kal tur hian zirlai mi 13 thlanchhuahte bakah Programme Officials mi 3 an kal dawn a. Prof. H.K. Laldinpuii Fente chu MZU representative turin he programme-ah hian a tel dawn bawk a ni. Kal tur zing atangin Education Minister Pu Lalchhandama Ralte chu he programme Opening Ceremony-a Chief Guest tura ruat a ni  bawk.

Asia Pacific Youth Exchange program hi kum 1-ah vawi hnih neih thin niin, Asia Pacific Countries-a zirlaite tana buatsaih a ni. Hetah hian ram hrang hranga naupang thiam thlan chhuahte chuan ni 16 chhung vel January thlaah Bangkok leh August thlaah S.Korea-ah intihsiakna hun an hmang thin a; hei hi thalaite leh thangtharten United Nations hnuaia Sustainable Development Goals (SDG) an hmel hriat a, mahni awmhmun theuha he project hi an kalpui theih nan leh, khawvel siam that hna hi an kuta a awmzia inhrilh hriatna hun atan hman a niin, naupang thlan chhuah kalkhawmte hian SDGs Goal leh Objective-te an hriat chian hnuah hun bi tukin thingtlangah research tiin project pek an ni thin a. An research tihte chu United Nations hmunpuiah, UN Representative-te hmaah an present leh a, chutah chuan a titha thlan chhuah an ni thin a ni.

Naupangin a research neihte (Problems identification and troubleshooting criteria-a duan) chu khawpuia a rawn let leh hnuah Mentor-in uluk takin a khawihpui leh a, chu’ng an project kalpuite chu community tana chhenfakawm tak niin, naupang thiamna leh remhriatnate hmang tangkaiin, awlsam takin community tihhmasawn hna khawtlangin an thawk thei thin a ni. Mizoram aiawha kal tur thlanchhuahte pawh hi an inbuatsaih nasa in beisei an nei sang hle a ni.