Vawiin chawhma khan Mizoram Youth Commission Chairman Pu T.Sangkunga, MLA chuan L.T. Facility Management, Model Veng a Hotel Changkang zawka hnathawh dan traning chhuakte hnena Certificate pekna hun leh hnathar zawm tur te thlahna hun a hmanpui a. Traning chhuak zinga 15 hian Eastin Hotel, Ahmedabad, Gujarat ah hna an zawm dawn in traning chhuak dang te hian Eastin Hotels ah tho hian thlaruk chhung House keeping leh food and beverage(F&B) serving an zir chhunzawm dawn a ni.
He huna thusawitu MYC Chairman Pu T.Sangkunga, MLA chuan Mizo thalai ten Aizawl khawpui bakah Mizoram hrim hrim nuam an ti lutuk chuan hmundanga hnathawk tura pen chhuah an harsat phah bakah an tuar chhel tawk loh phah nia a hriat thu a sawi a. Hmasawn tur erawh chuan kalchhuah a ngaih thu leh Mizoram a sum tam tak rawn thawn lut tura thalai ten Mizoram pawna hnathawktur a an chhuah nasat sual sauh a pawimawh tak zet thu a sawi a. Mizo ram sum dinhmun pawh kan human resources hmanga tih hmasawn theih a nih thu te sawiin hotel leh services industry hrim hrima hna hmu thar te tan tawrhchhel a pawimawh ber thu a sawi a ni. Mizoram budget tam tam tham tak sawrkar hnathawk hlawh ah a kal tawh a, hnathar lak phei chu thil awlai lo tak a nih avangin sawrkar hna aia company a hna zawn bakah mahni kutkawih ngeia dinchhuah kan intih hmuh a hun tawh a ni a ti.
MYC Secretary Dr. J.T. Vanlalngheta chuan L.T. Facility Managemnt Pvt. Ltd chu MYC hnuaia awm ni lovin an recognized a nih thu leh man power recruiters dang pahnih pawh an recognized tawh thu a tarlang.
L.T. Facility Managemnt Pvt. Ltd neitu Pu Lalduhawma chuan thalai 70 chuang Chennai, Kerela, Ahmedabad leh Mumbai ah hna an hmuhsak tawh thu sawi a. Traning thla 3 chhung an pek tawh te hi anmahni ngeiin hruaithla in Job Interview leh an hna hmuhna hmun thlenga an hruai thin thu a tarlang bawk a ni.
