Nimin (12.12.2016) khan East Tuipui Cluster hnuaiah NLUP 3rd Phase 2nd Installment chu Beneficiaries 46 hnênah Khawbungah Bialtu MLA Pu T. Sangkunga, MYC Chairman ni bawk chuan a sem.

Pu T. Sangkunga chuan beneficiary ten tanpuina an dawn chu hlawk pui ngei ngei tum tura chah in, eizawnna bultanna tur NLUP atanga an dawn tiriraltute chu mi hlawhchham tur chiangsa an nih thu a sawi a. Mi an vanduai hle a nih loh chuan an NLUP dawn hmanga hma la tak tak chu an hlawhtling zel thu a sawi bawk.

Nimin-a NLUP 3rd Phase 2nd Installment sem hi Commerce & Industry hnuaia trade 12 thlanchhuah thlangtu beneficiaries 46 hnênah hian a vaiin Rs. 21.62 lakhs sem a ni a. Carpentry trade thlangtu mi pali hnenah NLUP 3rd Phase Final Installment Rs 19,000 theuh pek an ni bawk. East Tuipui Cluster huam chhungah hian Commerce & Industry Deptt hnuai atangin chhungkaw 302 hnenah NLUP hi sem a ni tawh a ni.

NLUP semna inkhawm hi Khawbung Zawlbukah neih niin Pu H. Thangtluanga, I.P.O, D.I.C., Champhai chuan a kaihruai a. Khawbung BDO Pu James Lalnithanga chuan tawiawmin District Industry & Commerce atangin Pu Lalremthanga'n report a pe bawk.