Raja Ram Mohan Roy Library Foundation atanga sum hmuh cheng nuai 6 senga sak Lunglei Electric Veng YMA Library Building chu vawiin khan MYC Chairman Pu Joseph Lalhimpuia’n a hawng.

Hawnna inkhawm hi Electric Veng Branch YMA Secretary Pu F. Laltanpuia'n a kaihruai a, khuallian Pu Joseph Lalhimpuia chuan thu sawiin khawtlang mipuite thawhhona leh tanrualna avanga Library building tha tak mai Electric vengin an nei thei chu khawtlang mipuiten tangkai taka an hman a duh thu a sawi a. Tunlai khawvelah Social media hmanga thalaiten hun tam zawk an khawhral lai hian hlawkna awm lova hun hmang mi tamtak an awm tawh a, lehkhabu chhiar lamah hian thalaite kan let a tul hle a ni, a ti. Mizoram Youth Commission hmalakna thenkhat tarlangin Pu Joseph Lalhimpuia chuan kumin hi Sipai tan tam kumah an puan thu a sawi a, Kumina sipai lak runpui awm leh turah a tam thei ang ber Mizo thalai lak an nih theihna turin District hrang hrang atangin Pre-Recruitment neiin inbuatsaihna ngawrh taka kalpui a ni ang, a ti. Mizo thalaite, hna sang zawk leh Central Service lama tam zawk an luh theihna turin reilote ah IAS Coaching Aizawl leh Lungleiah tan a ni dawn a ti a, JEE NIT leh NEET bakah SSC online coaching pawh zirlaite tan 25% chauh chawiin bul tan a ni tawh a ti bawk.

Khualzahawm Pu Lalramliana, State Librarian pawhin Electric Veng Library a hman tur software thar, Library Committee ten an duan chhuah 'Run Mawi' chu a tlangzarh a, Library enkawl dan leh a tangkaina bakah Sawrkar atanga tanpuina awm thei hrang hrangte a sawi bawk a ni. Vawiina hawn tak Electric veng YMA Library hi a dung feet 26 leh avang feet 15 a ni. 

Lirary building hawnna inkhawm neih zawh hian Pu Joseph Lalhimpuia chuan a bial Lunglei East chhunga YMA Branch 13 te hnenah MLA Fund cheng nuai 3 leh sing 5 man PA set, chhiatni thatni a hman tur a sem nghal a ni.