Lunglei Dist. chhunga Kawthalo do beihpui thlak, Intensified Diarrhoea Control Fortnight chu Lunglei CMO Dr. Thani Pachuau chuan vawiin khan a hawng. Hawnna inkhawm hi Govt. Venglai Middle School, Lungleiah neih niin Senior Medical Officer Pi Lalrinthangin a kaihruai a, khuallian Dr. Thani Pachuau chuan thu sawiin kawthalo do beihpui IDCF hman a tulna chhan kawng hrang hrang a tarlang a. Kawthalo avangin India ramah kumtin naupang kum 5 hnuai lam mi nuai khat thi ang a chhut a ni a ti a, hei vang hian kawthalo beihpui thlak chu kum 2014 atanga neih tan a ni a, hei hian nasa taka kawthalo dona kawngah hma a sawntir avangin chhunzawm zel a ni a ti. Dr. Thani chuan IDCF in a tum ber chu kawthalo avanga naupang thi an awm tawh lohna tura beih a ni a ti a, thianghlimna leh faina kawngah tan kan lak thar a tul hle a ni tiin naupangte pawh faina kawnga midang zirtirtu an nih zel a pawimawh thu a sawi bawk a ni. Kawthalo do beihpui thlak hawnna hunah hian Lunglei Nursing Superintendent Pi Lalzami pawhin naupang leh zirtirtu kalkhawmte hnenah kut sil dan dik a zirtir a, Pu Micky Lalenkawla DPC, SSA Lunglei pawhin lawmthu sawina hun a hmang bawk.