Vawiin khan Mamit District Hospital, OPD Building-ah  District hnufual chawikan ngai (Aspirational District) te tana duan Gram Swaraj Abhiyan - Mission Indradhanush chu  Pu Bhupesh Chaudhary, Mamit District Bawrhsap chuan a hawng.

District hnufual chawikan ngaite tana naupang kum 2 hnuailam leh nu naupai mekte'n hri danna chi sarih (7) an lakna tur Programme hawnnaah hian Mamit Bawrhsap chuan thusawiin India ram chu khawvela ram lian leh mihring tamna ram kan ni a. Mipui chengte tun aia kan lo hrisel chhoh zel theihna tur chuan naupanlai leh nuin a pailai atanga natna chi hrang hrang laka invenna Vaccine lak that a pawimawh a. Naupiangte an hrisel chuan India ram paw'n nasa takin hma a sawn chhoh phah dawn a ni a ti. 

Mamit District chu kawng hrang hrangah kan hnufual a, hriselna kawngah pawh District dang aiin kan hnufual a, hei vang taka Aspirational District-a puan pawh kan ni a. District mipuite kan tanrual a, hriselna kawnga nasa taka tan kan lak chuan Mamit District chu District changkang ber kan ni thuai ang a ti bawk.

Gram Swaraj Abhiyan-Mission Indradhanush hi ni 7 chhung awh tur a ni a. Mamit District chhunga khaw hrang hrang 18 -ah nu naupai mekte leh naupang kum 2 hnuailam hnenah Vaccine pek an ni ang.

Vawiin Programme hawnnaah hian Mamit Bawrhsap chuan hri danna (Vaccine) naupang hnenah a pe nghal bawk.

He hun hi Dr.TC Hmingthangi, District Immunization Officer, Mamit District-in kaihruaiin Dr. Zothankhuma Chhakchhuak CMO, Mamit-in kalkhawmte lawmna thu a sawi a ni.

Attachment

  • Loading attachment...