Vawiin chawhma khan Dawrpui School Conference Hall-ah Health Minister Pu Lal Thanzara chuan kar hnih chhung kalpui tur, kawthalo vanga naupang thihna um bo a nih theih nana hmalakna ‘Intensified Diarrhoea Control Forthnight (IDCF) 2018’ a hawng. July Ni 16-28 chhung hman tur niin thupui chu  ‘Kawthalo vanga naupang thihna hi i um bo ang u’ tih a ni.

Health Minister Pu Lal Thanzara chuan National Health Mission (NHM) thil tum lian ber pakhat chu naupang thihna tihtlem a ni tiin India rama kumtina nausen leh naupang nunna hlu tak suat thintu zaa sawm (10%) hi kawthalo a ni, a ti a. Kawthalo hi natna tlang lawn leh huatthlala tak,  hotea lang si enkawl that loh chuan thihna thlen hial thei a ni, a ti a. Nipui boruak leh furpui chhovah a hluar thin hle a, hemi avang hian sawrkar laipui kaihhruaina hnuaiah Mizoramah pawh kum 2014 atang khan kawthalo dona atana hmalakna IDCF hi kan lo hmang tawh thin a ni tiin IDCF kalpui chhung hian ASHA ten mahni bial chhung theuhah in tina naupang kum nga (5) chin hnuai lam tlawh chhuakin ORS an sem ang a, kawthalo ven dan leh enkawlnate hrilhin ORS siamdante an zirtir bawk ang, a ti a. Minister chuan kawthalo enkawlna tha ber chu ORS leh Zinc hi a ni tiin ORS leh Zinc thatnate hi kan hmel hriat tha viau tawh nachungin National Family Health Survey (NFHS)4-a a landanin naupang kawthalo 69% chauhin ORS-a enkawlna an dawng a, 29% chauhin zinc-a enkawlna an dawng a ni, a ti a.  ORS leh Zinc uar zawka kawthalo enkawl nan hman chu hmachhawp lian tak pakhat a nih thu a tarlang a. Kawthalo avanga thihnate, a venna leh enkawl kawngah nasa lehzuala mimal tin leh a khawtlang anga tan lak a ngaih thu a sawi a. Keimahni in vawngfaiin kan in leh a velte vawngfai theuhin ang u tiin kalkhawmte chu a chah a ni.

Intensified Diarrhoea Control Fortnight (IDCF) hi kawthalo do beihpui thlakna niin kum 2014 atanga khan hman tan a ni a. Kumtin fur ruahtui tam hma/tam laia hman thin a ni. Mizoramah pawh India ram hmun hrang hranga hman a nih rualin lo hman tawh thin a ni a. Kumin pawh hian July Ni 16 – 28 , 2018 chhungin district tinah hman leh tur a ni a. He fortnight chhung hian naupang kawthalo enkawl nana tha ber “ORS leh Zinc”   thatna nasa lehzuala zirtirna pek a ni leh ang. Sawrkar damdawi in, Subcentre leh Anganwadi Centre-ah ORS-Zinc Corner siam a ni ang a, heng hmunah hian naupang kawthalote enkawlna pek an ni ang. ORS siamdan te, faina chungchang te leh ORS leh Zinc pawimawhna te a hmuna thawktuten an hrilh thin dawn a ni.

Programme hi National Health Mission Director, Dr. Lalrozama, IAS chuan a kaihruai a. Reproductive and Child Health (RCH) SPO Dr. Hmingthanmawii chuan Diarrhoea Control and Prevention chungchang thusawina hun a nei a. Naupangte hnenah kutsil dan inzirtirna hun neih a ni a. Health Minister hian ORS packet zirlai naupangte hnenah a sem a. H& FW hnuaia Reproductive and Child Health (RCH) ten Health Minister hnenah lawmthu sawina citation an hlan a. MCH SNO Dr. Lalthanpuii chuan lawmthu sawina in hun a khar a. Health Department, Social Welfare Department , School Education Department, Rural Development Department hotute leh hnathawkte, Dawrpui Anganwadi zirtirtu leh zirlaite, Centenary School Dawrpui zirlaite an tel a ni.