3149/2024-2025

Dated Aizawl: the 22 November 2024 : Vawiin chawhma khan Pu Malsawmzuala Ralte, Chairman, Mizoram Youth Commission chuan MYC leh Honda India Foundation-te tangkawpin an buatsaih Project Buniyaad Hotel Management (Food & Beverages) Training chhuak state pawna hnathawk tur Mizo thalai 26 (Mipa 9 leh Hmeichhia 17) te chu a thlah liam.

He hunah hian MYC Chairman chuan fuihna thu sawiin thalaite chu an hnathawhna hmun theuhvah rinawmna nunpui turin a chah a, Pathian tih chung leh inpumpekna tak tak nen, hotute duhsak tlak a hna thawk tura fuihin, midangte tana kawngsat kaw tu an nih anga Mizote tihmingthatu leh Mizo mipui aiawh an nihnate chu hre reng turin a chah bawk a. Chhel taka awm tur leh mahni inthunun tura fuihin, hlawh hmu tlak ngei a hnathawk theuh turin a fuih bawk a ni.

Vawiina hun hmanah hian, hnathawk a kal turte nen zawhna leh chhanna hun hman nghal a ni a, an kalna hmun tur kaihhnawih a hriattur pawimawhte sawihona hun hman nghal a ni bawk a. Thalai hnathawk a kal turte hi MYC Office hmunah an thawhhna turte hian rawn kal chilhin, interview-te an neihpui hnuah, training zawng zawng te chu an thlang ta vek a ni.

Hnathawk turte hi India ram chhung hmun hrang hrang heng: Fairmont(Udaipur) Choki Dhani (Jaipur, Jaisalmer, Indore) Orange Tiger (Goa) Sarvar Hotel (Hyderabad) leh Status Club (Kanpur) ah te hian an insem darh dawn a ni.

Project Buniyaad Hotel Management (Food & Beverages) Training hi Chief Minister Pu Lalduhoma chuan September 18,2024 khan MYC Auditorium ah a lo hawng tawh a. Hemi hnuaiah, Tunah hian MYC chuan F&B Training hi Aizawl Centre ah 2nd Batch kalpui  mekin, Lunglei Centre ah pawh Training hi kalpui mek a ni bawk a. December thla atang hian Aizawlah chuan 3rd Batch kalpui leh tura ruahman niin, training chhuakte chu Aizawl hmunah ngei India ram hotel changtlung tak tak neitute chuan rawn kal chilhin an Hotel a thawk tur mi an rawn thlang leh dawn a ni.