3148/2024-2025

2024 Sahmulphah thla ni 22 : Vawiin khan Lunglei Deputy District Election Officer Pu James Miahlung chuan nakkuma Lunglei District-a local council (LC) leh village council (VC) inthlanpui buatsaih tura electoral roll en nawnna beh chhana hman tur draft electoral roll chu Lunglei DC Conference Hall-ah a tlangzarh.

Deputy DEO Pu James Miahlung chuan LC & VC inthlanpui buatsaih tura draft electoral roll atan hian kum 2022 MLA roll chu beh chhanah hman a nih thu sawiin, mipuite draft roll-a an chuan leh chuan loh inenfiah a, hun hawn chhunga siam ?hat ngai buaipui turin a chah a. Electoral roll dik leh felfai a awm theih nan a buaipuitu official-te chu fimkhur leh uluk taka kalpui tura chahin, political party-te leh tlawmngai pawlte pawh ?ha taka official-te thawhpui turin a ngen bawk.

Draft electoral roll tlangzarhna hun hi Election Officer Pi R. Lalrinzuali chuan kaihruaiin, draft electoral roll dinhmun tlangpui a tar lang a. LC & VC inthlan atana electoral roll en nawn tur chu Election Commission of India (ECI) hnuaia special summary revision kalpui nen a inrual avangin hriat pawlh loh tur a ni tiin, LC & VC roll-ah chuan scheduled tribe ni lo chu chuan theih a nih loh thu a sawi a. Draft electoral roll tlangzarh tak hi political party hrang hrang ai awhte hnenah sem nghal niin, election official-te, Electoral Registration Officer (ERO), Assistant ERO leh political party ai awh kal khawmte chuan inthlan buatsaih tur chungchanga thil pawimawh hrang hrang an sawi ho zui bawk.

LC & VC draft electoral roll tlangzarh tak a?anga a lan danin, Lunglei District hnuaiah local council 24 leh village council 88 awmin, village council hnuaiah hian khawper (sub-village) 18 a awm bawk a. Lunglei Municipal Council (LMC) huam chhung local council awmnaah vote nei mi 41,132 (mipa 19,471 leh hmeichhia 21,661) awmin, LMC pawn lam village council awmnaah vote nei mi 50,111 (mipa 25,798 leh hmeichhia 24,313) an awm thung a. Lunglei District chhunga LC leh VC hnuaiah a pum puiah vote nei mi 91,243 (mipa 45,269 leh hmeichhia 45,974) an awm a ni.

Vawiina tlangzarh tak draft electoral roll ang chuan, Lunglei District-ah chhungkua (household) 23,444 (local council huam chhungah 10,862 leh village council huam chhungah 12,582) an awm a. Local council hnuaiah Electric Veng chu a pum puia voter tamna ber (3,327) leh mipa voter tamna ber (1,574) niin, Chanmari chu hmeichhe voter tamna ber (1,768) a ni thung a; Sazaikawn chu voter tlemna ber (320), mipa voter voter tlemna ber (159) leh hmeichhe voter voter tlemna ber (161) a ni thung. Village council hnuaiah Tlabung chu a pum pui (2,290), mipa (1,105) leh hmeichhia (1,185)-ah voter tamna ber ni ?heuhvin, Sailen chu a pum pui (79) leh hmeichhia (36) voter tlemna ber niin, Thangpui chu mipa voter tlemna ber (42) a ni thung.

LC & VC inthlanpui atana electoral roll en nawn turah hian India khua leh tui, scheduled tribe (ST) kum 18 tling chin, January ni 1, 2007 leh a hma lama piang, LC/VC huam chhunga cheng nghet, electoral roll-a inziah luh thar, paih, insawn leh siam ?hat duhte tan December ni 9, 2024 (Thawh?anni) thleng dilna hun hawn a ni a. Dilna hi form ruahman bik (Form 3/4/5) hmangin mahni bialtu Local Level Officer (LLO)/Village Level Officer (VLO) te hnenah theh luh tur a ni a. January ni 8, 2025 (Nilaini)-ah final electoral roll chu tar chhuah tura ruahman a ni.