3147/2024-2025

Saitual, the 22nd November, 2024: Vawiin chawhma dar 10:30 am khan Mizoram State Election Commission ruahman angin 21st General Election to Village Council, 2025 (qualifying date- 01.01.2025) Draft Electoral Rolls chu DC Conference Hall, Saitualah District Election Officer, District Bawrhsap ni bawk Dr. Lalngura Tlau chuan a tlangzarh a, VLO te chuan training an nei zui nghal a ni.

He hunah hian Dr. Lalngura Tlau chuan kalkhawmte hnenah lawmthu sawiin, roll inthun leh paih chungchangah fimkhur turin a chah a, MLA inthlana roll a chuang si, VC roll a chuang si lo te chuan vote an thlak theih loh tur thu chiang taka mipuite pawh hriattir turin a chah. DEO chuan ram mipuiten an dikna chanvo an hman theih nan leh an vote hlu takte an thlak theuh theih nan theih tawp chhuah zui tur leh training hlawkthlak tak nei theuh turin kalkhawmte a chah nghal bawk a ni.

Saitual Block Level huam chhungah VLO 21 awmin DC Conference hall, Saitual-ah training hi neih a ni a, Pi Christina Lalnunfeli ,SDC chu resource person a ni. Ngopa Block huam chhungah VLO 18 awmin BDO Conference Hall, Ngopaah training neih a ni a, resource person chu Pi Dorothy Muansangi, SDO(C) Ngopa a ni. Phullen Block-ah VLO 16 awmin BDO Office, Phullenah Pu J Lalhmahruaia, BDO phullen hovin training hi neih a ni bawk.

Vawiina draft roll tlangzarhna inkhawm hi Pu Lalthakima, EO chuan a kaihruai a. Hemi rual hian Village Council Electoral Roll buaipui chungchang leh hearing neih chungchangah Saitual District huam chhunga Block Level pathum, Saitual, Ngopa leh Phullen-ah te training neih a ni bawk. He draft roll tlangzarhna hunah hian DEO leh DC ni bawk Dr. Lalngura Tlau bakah ERO, AERO, SP Office aiawh, VLO te, Political party aiawhte, tlawmngai pawl aiawhte an tel a ni.