3144/2024-2025

Champhai, 22nd November 2024: Vawiin chawhma dar 11:00 khan Champhai Bawrhsap, District Election Officer ni bawk Pu VL Remliana chuan VC Inthlan 2025 puala Special Summary Revision neih tura hman tur Draft Roll a tlangzarh.

Draft Roll tlangzarhna hun Champhai Bawrhsap pisa-a neihah hian Pu VL Remliana chuan thu sawiin roll thianghlim leh hrisel neih chu ram rorelna leh inrelbawlna atana thil pawimawh tak a ni, a ti a. Roll felfai tak a awm theih nan sawrkar official-te, political party leh tlawmngai pawlte thawhhona a pawimawh thu a sawi bawk a ni.

Special Summary Revision-ah hian January ni 1, 2025-a kum 18 tling chin te tan roll-a inziahluh theih a ni dawn a. November ni 25 aṭanga December ni 9, 2024 chhung hian roll-a inziaklut thar duh te tan leh insawn, hming paih leh siamṭhat ngai nei te tan dilna thehluh theih a ni ang. December ni 10 aṭanga ni 19, 2024 chhung hian dilna lutte hi chinfel tur niin, January ni 8, 2025-ah Final Roll tihchhuah a ni ang.

Vawiina tlangzarh tak Champhai District Draft Electoral Roll in a tarlan danin, Champhai District-ah hian Village Council 62 a awm mek a. In 16260 awmin, VC Seat 276 a awm a; vote nei mi 53593 - mipa 26154 leh hmeichhia 27439 an awm mek a ni. Vote tamna ber VC chu Champhai Vengthlang VC (member 7) niin, voter 2529 an awm a, vote tlemna ber VC chu voter 117 awmna New Hruaikawn VC (member 3) a ni.

The Lushai Hills District (Village Councils) Amendment Act, 2014 in a tarlan angin, VC member awm zat tur hi khuaa in awm zat aṭanga thliar fel ṭhin a ni.

1. In 200 hnuailam : Member 3 (1 Reserved Seat)

2. In 200-500: Member 5 ( 1 Reserved Seat)

3. In 500 - 1000: Member 7 (2 Reserved Seat)

4. In 1000 chunglam : Member 9 (3 Reserved Seat)

VC draft roll abstract .pdf