East Tuipui Constituency MLA leh Mizoram Youth Commission Chairman ni bawk, Pu T. Sangkunga chuan nimin March ni 17 khan Sesih Community Hall-ah Zopui Tlang Area MUP conference vawi 24-na a hmanpui. Zopui Tlang Area MUP hian Khuangleng bial a huam a, he area chhungah hian MUP unit 5 - Khuangleng, Sesih, Leisenzo, Lianpui, Vangchhia leh Sazep an awm a ni.

Khuallian Pu T. Sangkunga chuan upa te pawimawhna hrang hrang tarlangin upa te'n an tawn hriat hmanga thangtharte hnêna thurawn pek inthlahrung lo turin a chah a. Upate chu library pawimawh tak an ni, a ti. Pu T Sangkunga chuan candidate a nih dawna a duhthusam, hna tak tak thawk tura hna thawh kawr a ha thei chu lawmawm a tih thu a sawi a. “Khawbung Mini Sports Complex” NLCPR Project a thun tawh, Cheng nuai Rs 368.89 ruahman atanga cheng nuai 133.16 sanctioned a nih thu leh bial chhunga hmasawnna hrang hrang chhuak tawh leh ruahmanna awm mekte a sawi bawk.

Member boral mi 62 te sûnna hun Bialtu Pastor Rev. C. Lalmalsawman a hmang a. MUP Unit hrang hrangte hian lengkhawmzaiin an intihsiak bawk a ni.

Nizan vek khan Pu T Sangkunga hian Dungtlang Community Hall-a Tuipuiral Block MHIP Conference vawi 20-na hmanpuiin East Tuipui huam chhunga khawtlang din school leh Kohhran school leh Private English Medium school te chu bial hmasawnna tura hmanraw pawimawh leh tangkai an ni tiin, an hmasawnna chu a rilrua a awm len thu a sawi a. Zingkarah Dungtlang khaw bula pi pu sulhnu hlui tlawhin Tuipuiral huam chhunga hmun hlui tam tak awm avang leh INTACH Mizoram Chapter te hmalakna avanga Archaelogical Survey of India (ASI) in Aizawl Circle a rawn din tur thu te, Aizawl Circle thara hna (post) hrang hrang dah tur tun thla March ni 2-a sanctioned a nih thu a sawi a. Tuipuiral mipuite chuan ASI hnathawktute leh hmun pawimawh tlawhtute lo dawnsawn pawh an thiam hle nia a hriat thu a sawi bawk. ASI hian Vangchhia a Kawtchhuahropuiah hna an thawk mek a, hemi zawh hian Dungtlang leh Lianpui khuaah te hna an thawk chhunzawm leh dawn a ni. lnm