Pu Hmingdailova Khiangte, Parliamentary Secretary chuan nizan khan 15 - 17 March, 2016 chhunga Hortoki Vengchhaka neih Awithangpa Group YMA Conference vawi 8-na a hmanpui a; YMA member te hnenah thusawiin Mizoram ah hian Rel kawng a lokal ngei dawn ta a; ruahman anih lai khan mi thenkhat chuan an hlauthawng a; mahse hmasawnna tura thil pawimawh anih avangin hnawl ringawt tur a ni lo a; kan hlauhthawn vanga himlo nia kan lo hriat te kha vawiin ah hian a hmachhawn dan tha kan ngaihtuah tur a ni a; mite sawisel lai te pawh kha sawisel ngai lo turin kan lo buatsaih lawk tur a ni a ti.

Pu Hmingdailova Khiangte chuan YMA in ram pum huapa chawimawina ropui ber National Award a dawng chu a lawmpui thu sawiin Krismas leh Kumthar lawmna hun hman laia Sawrkar an thawhpui avanga lawmthu sawiin Sawrkar tan tangkai taka hun hmang zel turin a chah. Kan ram leh Hnam hi eng vanga humhalh ngai nge a nih a; khawi laiah nge humhalh tur tih leh tu te nge humhalhtu tur tih chu Mizo ten zawhna kan chhan tur a ni a ti bawk.

He Group Conference hi Pu J Lalsailova Central YMA Treasurer leh CEC member te; Kolasib Sub Hqrs YMA President Pu CT Mawia leh a thawhpui te; Zampuimanga Group YMA President Pu Vanlalbika leh a thawhpui ten an hmanpui a. Conference chhung hian MGNREGS, Malaria venna, Minor Irrigation Project, Consumers Rights, Water Sanitation, SSA, Fire Prevention chungchang Campaign nan hun an hmang nghal bawk.

Awithangpa Group YMA Conference ah hian YMA Branch 13 te chu inelna chi hrang 4 hmangin an inel a; Kum 2016 - 2018 inkar chhunga Group YMA hruaitu an thlang bawk.

Attachment

  • Loading attachment...