Vawiin khan Information & Communication Technology (ICT) Minister Pu Lal Thanzara chuan Lal Thanhawla Auditorium-ah National Institute of Electronics & Information Technology (NIELIT) zirlai kal chhuak thlahna hun a hmanpui.
Pu Lal Thanzara chuan zirlai kalchhuakte lawmpuina thu sawiin hnung lam hawi lova beiseina nen hmalam thlir chunga ram leh khawtlang tan enge an tih theih tih ngaihtuah turin a sawm a. India ramah hian IT sector chu thawktu ruaitu tam ber ni mekin mi maktaduai 13 zetin eizawn nan an hmang a, IT policy tharah sawrkar laipui chuan kum 2020 ah chuan skilled manpower maktaduai 10 zet siam belh a tum a ni, a ti. ICT Minister chuan sawrkar laipuiin Digital India a kalpui mek chungchang sawiin kum 5 chhunga thingtlang khua leh khawpui tenau deuh atanga zirlai maktaduai 1 zet IT training neih tir tum an nih thu te, hmarchhak state tinah BPO service centre siam te, IT hmanga sumdawng thei turin agency nuai 3 training pek te leh thingtlang khuaah Telecom Service Provider (TSP) ni thei turin mi nuai 3 training tir tum an nih thu a sawi a. North East BPO Promotion Scheme kaltlangin Mizoramah pawh STPI tanpuina in mimal sumdawngte leh pawlho tan BPO a din theih reng tawh a ni, Pu Lal Thanzara chuan a ti. Digital India programme bawhzui nan Mizoram sawrkar pawhin kum 2017 atangin sawrkar hnathawk lak thar leh kaisang turte tan computer thiam nih a ngai tawh dawn, Minister chuan a ti bawk.
NIELIT Director Debachandra Singh pawhin thu sawiin NIELIT din tan a nih dan leh DOEACC tiha hriat lar thin NIELIT tia thlak a nih dan leh an Institution dinhmun tlangpuite a tarlang a. Zirlai kalchhuakte lawmpuiin bul an tan chauh tih hriaa hmasawn tumna thinlung nen taimak chhuah sauh sauh turin zirlaite a fuih a ni.
ICT Minister leh NIELIT Director te hian zirlai kalchhuak te hnenah ngaihruina thuziak an hlan.
NIELIT-ah hian zirlai 450 awmin thawktu 60 an awm a. Master in Computer Applications (MCA), Bachelor of Computer Applications (BCA), Diploma in Computer Science and Engineering (DCSE), Diploma in Electronics and Telecommunication Engineering (DETE), NIELIT ‘O’ Level leh NIELIT ‘A’ Level a zir theih a. NIELIT CCC hi Mizoram sawrkar chuan computer thiamna minimum level-ah a pawm a ni. Study Centre hmun hrang hrangah neiin Lungleiah Extention Centre an nei bawk. Boys hostel mi 100 awm theihna leh zirlai hmeichhia 60 awm theihna hostel neiin hmarchhak state hrang hrang atangin zirlai engemawzat an nei a ni.
