Tuipuiral Zirlai Pawl (TZP) General Headquarters chuan vawiin ni 30 July, 2016 hian I&PR Auditorium, Aizawlah Freshers’ Social an hmang.He hunah hian Pu T. Sangkunga; Bialtu MLA leh Mizoram Youth CommisionChairman ni bawk chuan hun hmanpuiin “Zirlai Pawl Movement vangin ram leh bialin a tuarin hma a sawn phah thei a; Tuipuiral Zirlai Pawl hmalakna zarah an bial pawhin zirtirtu sawn chhuah tur eng emaw zat an hum tawh a ni,” a ti.

Tunlai khawvela Zirlaite tana English leh Hindi thiam a pawimawhzia sawiin Pu T.Sangkunga chuan Tuipuiral bial chhungah chuan English Medium awm vek thei se a ti a. Zirlai hruaitu leh zirlai tan chuan zirlai aia pawimawh a awm lo va, a phaw vuaka thamral a hlauhawm a ni, a ti. Tuipuiral huam chhungah hmasawnna tam tak a thleng mek a, kawng hrang hrangah thawh mai theihtura hma lak mek te, bawhzui mek te a awm niin Tuipuiral bialtu MLA chuan a sawi a. Dungtlanga Tuipuiral Zirlai Pawl (TZP) in rei tawh taka MP fund hmanga sak tawh chu sak that leh nghal tura ruahman fel tawh a nih thu a sawi bawk.

Bialtu MLA leh khuallian ni bawk hian TZP freshers social hmanna senso a tumsak bakah kum 2015-a Master of Commerce (M.Com) Gold Medalist C.Lalthlanpari hnenah Laptop thar a hlan bawk a ni. MLA Special Award hi kum tinin an member Mizoram huapa topper ni pha chin hnenah hlan thin tur a ni. Heng bakah hian TZP member Mizoram University hnuaia Under Graduate course zir zo zinga top 10-a lang pha leh an bial tihmingthatute chawimawina an hlan nghal bawk.

Asst. Welfare Commissioner Pu Francis Lallianmawia chu khual zahawm niin he hunah zirlai tharte lawmna leh fuihna thu a sawi a ni.

TZP freshers social ah hian member zahnih chuang an tel a ni.