Vawiin khan Chief Minister Pu Lal Thanhawla'n All India Radio (AIR), Aizawl Station in an kum 50 tlin lawmna programme 'AIR Aizawl Golden Jubilee' Vanapa Hall a an buatsaih chu khuallian niin a hmanpui.

Chief Minister Pu Lal Thanhawla chuan All India Radio Aizawl in kum 50 hmel a hmu ta chu lawmawm a tih thu sawiin vawiin thlenga Mizoram mipuiin Radio an la ngaithla leh an ngaihhlut chan chu a bul tantu te, lo thawk tawh te leh tuna thawk mek te thawhrimna, inpekna, thahnemngaihna leh rinawmna avang a ni tiin AIR Aizawl nen a kum 50 kalta a laichinna nei zawng zawngte chu Golden Jubilee duhsakna a hlan. Rambuai lai khan radio chu mipuite thleng phak huapzau ber a ni a, mipuiin an tangkaipui hle a, chanchin thar thehdarh  piah lamah zai leh hla thlan programme te khan mipui an awi hneh a, curfew avanga mipui inkhawm theilo te khan Pathian fakna hla radio ah an ngaithla thin a, chuvangin AIR Aizawl hian nasa takin mipui tan rawng an lo bawl tawh thin a ni, a ti.  All India Radio Aizawl in a programme a tihchhuah  te hi Mizoram mipuite bakah State danga Mizo awmte leh Bangladesh leh Myanmar rama Zohnahthlak ten an hlawkpuiin an tangkaipui tiin Zohnahthlak te insuihkhawmna hmanraw pawimawh tak nia a hriat thu Chief Minister hian a sawi bawk.

Chief Minister chuan All India Radio Aizawl hi vawiin ni thlenga thalai leh zai lamah talen nei tha te chawikangtu leh vawrhlartu pawimawh tak anih thusawiin radio hi a lar chho mek a, Facebook, Whatsapp leh social media dangte karah Mizo mipuite rilru leh thinglungah radio in hmun a luah reng theih nan tuna thawkte chu intuaihriam a, mipui ti tlei thei programme buatsaihna kawnga tan la chho zel turin a fuih a ni.

Pu Lal Thanhawla chuan Prime Minister Pu Narendra Modi'n radio huapzauna leh a thiltihtheihna te hria chumi hman tangkai nan a, All India Radio-in hmangchang hre taka Maan Ki Baat hlawhtling taka an buatsaih chho hi a lawmawm hle a, hei hian tunlai thiamna leh technology karah pawh radio hian tangkaina a nei a, hlutna leh thiltihtheina pawh a la nei a ni tih hi a nemnghet a ni, a ti.

He hunah hian Hla Inphuahsiak lawmman hlanna leh Radio a tum za aia tam hun hmang tawh te, Top Radio Artiste te bakah AIR a lo thawk tawh te hnenah ngaihruina hlanna hun hman a ni bawk.

Vawiina AIR Golden Jubilee programme ah hian Hmarchhaka AIR leh DDK hotulu pahnih - Pu D.N. Basumatari, Addl. Director General (Programme & Administration), North East Zone & Eastern Zone leh Pu M.S. Ansari, Addl, Director General(Engineering) North East Zone te pawhin an lawmpuina thu an sawi a. Inlawmna thusawitu Pu D.R. Lalropuia, Director (Engineering) leh Head of Office, AIR Aizawl chuan AIR Aizawl bul tan chhoh dante sawiin AIR Aizawl dinhmun te a tarlang a. Kum 50 chhung AIR hnathawh tarlanna Documentary film chu he hunah hian chhuah a ni bawk a. Radio artist hrang hrang ten hun hmangin Pi Linda Zopuii Mukherjee, Head Of Programmes, AIR Aizawl chuan lawmthu sawiin hun a khar a ni.

All India Radio Aizawl Station hi July ni 31, 1966 khan din niin 150 Watt  Transmitter hmangin bul tan a ni a. Hmarchhakah hian AIR Guwahati, AIR Shillong leh AIR Pasighat te hian Golden Jubilee an hmang tawh a, AIR Aizawk hi a palina a ni. Tun dinhmunah hian AIR Aizawl hian an Primary Programme hi nitin darkar 14 a tichhuak a, FM hi nitin darkar 8 a ti chhuak bawk a. Hengte hi 20 KW Medium Wave Transmitter, 10 KW Short Wave Transmitter leh 6 KW FM Transmitter hmangin an tichhuak a. Tunah hian AIR Aizawl ah hian thawktu nghet 77 leh contract staff engemaw zat an awm a ni.