Pu R.Lalzirliana, Home Minister hovin Aijal Club-ah Tuichangral Zirlai Pawl Fresher Social leh zirlai titha chawimawina inkhawm neih a ni a, Pi Vanlalawmpuii Chawngthu, MLA, Hrangturzo Consituency chu khualzahawm a ni. Inkhawm hi Lalmuansanga Hlawndo, Information Secretary, TCZP in a kaihruai a, Hrangturzo bial atanga zirlai 80 chuangte hnenah chawimawina hlan a ni.

Pu R.Lalzirliana chuan vawiin a chawimawina leh lawmpuina dawng thei khawpa mahni hnaa rinawm malsawmna dawng tlaka lehkha zira mahni thawhrah duhawm tak sengtute chu zahna chibai bukin hlawhtlinna kawng hi a awlsam ngai lo a ni a ti. Vawiina kan chawimawi mek zirlai chhuanawm tak takte chu an hlawhtlinna a ropuia, an mahni pawh inchhuang se, chutihrual chuan chapo lo turin a chah bawk. He hlawhtlinna hi khawvel tak tak hmachhawn tura an rahbi hmasa leh kawtchhuah chuangkai tan a inngai turin Minister chuan a chah. Zirlaite chu duhthlanna dik siam tur chuan mahni inhriatchian a pawimawh hmasa a, mahni tui zawng, thiam zawng, nuam tih zawng hrechiang apiangin an kawng an thlang fuh duh bik a, lungawina pawh an hmu sam bik thin a ni a ti.

Minister chuan zirlaite chu chhawr tlak, hmantlak, rawih tlak ni ngei turin an zir leh zel turah pawh rilru nei tlat turin a chah a, lehkhabu leh class room zirtirna atanga thiamna ngawt piah lamah tunlai khawvelin eng thiamna nge a mamawh tih ngaihtuah ran chunga skills hrang hrang nei tel ngei tur pawhin tan la turin a chah bawk a ni.

Khualzahawm Pi Vanlalawmpuii Chawngthu chuan zirlaite chu tum neia lehkha zir a, social media lakah fimkhur turin a chah a, tunlai khawvelah mi bik tan lo chuan hlawhtlin a harsa a, chuvangin lehkha zirnaah theihtawp chhuah angaih thu a sawi.

Inkhawmah hian Lalthangzuala President, TCZP chaun thusawina hun hmangin Lalthawhsaka Fanai, General Secretary in an pawl chanchin report tawi pekna huna hmang bawka ni.