Sihphir Venghlun Branch YMA buatsaihin vawiin khan Sihphir khaw hming put chhan, Sihphir lui chhinchhiaha lungphun chu bialtu MLA, Deputy Speaker Pu R.Lalrinawma'n a hawng.

Pu R.Lalrinawma chuan thil hlui vawn that leh hlutthiam hi hnam changkang te zia a ni a, Mizo te pawhin kan hnam rohlu ngaihhlut a, chhinchhiahna chang kan lo hre chho zel hi hma kan sawnna ti langtu a ni, a ti a. Kan hnam nunphung leh ziarang te ngainepa zahpui mai lova chawinun leh vawnhim hi hnam anga kan mawhphurhna a ni a, mahni hnam nunphung leh ziarang humhalha chawinungtute hi hnam ropui an ni fo thin, Deputy Speaker chuan a ti.Sihphir Venghlun YMA ten Sihphir khaw hming put chhan hriatrengna lungphun hawn theiha an buatsaih chu Sihphir khaw mipuite tan thil chhinchhiahtlak tak a ni tiin Pu R.Lalrinawma chuan Sihphir khaw mipuite inpumkhatna ti nghettu a nih a beisei a.

Sihphir khaw hmingchhiat leh thatah mawh an phur tlang vek tih hriaa an khaw hmasawn nan lungrual taka thawhhopuiah a sawm a ni. Sihphir khaw hming put chhan tak hi Sihphir Venghlun chhuahlam, khaw mawnga Sih, hnar sarih neih, thal va ek charah pawh kang ngai lo a awm a.Sihphir khuaa lo cheng hmasa tawh te pawhin tui tlan bera an neih a ni. He Sih hi khaw hmingah puin Sihphir tih a ni. Sihphir Lui Tuikhur hi a kang chah loh nan thing engemawzat phun belh tum a ni bawk.

Sihphir Lui Tuikhur, Sihphir Venghluna Sihphir khaw hming put chhan chhinchhiahna lung hi mi thahnemngaiten ni 7 chhung an siam a, a dung ft 5, a vang ft 4 a ni. A siamna senso hi bialtu MLA Fund, Art & Culture sum leh Village Council atanga hmuh a ni.

Lungphun hawnna inkhawm hi Sihphir Venghlun YMA President Pu Albert K.C. Lalvulliana'n a kaihruai a. Khual zahawm, Art & Culture Director Pu R.Hmingthanzuala, Sihphir Venghlun VCP Pu H.Zakunga leh Sihphir Venghlun YMA Secretary Pu PL Lalparmawia ten thu an sawi a ni.