Vawiin khan Mizorama Jan Aushadhi Store (JAS) leh Common Service Centre inkawp dawr hmasa ber Hruaizel Pharmacy, Vaivakawn chu Health Minister Pu Lal Thanzara'n a hawng.
Pu Lal Thanzara chuan Jan Aushadi chu mipui damdawi tihna niin damdawi tha, man tlawm taka leina a ni a, mipuiin awlsam taka sawrkar an dawr theihna tur CSC nena hawn kawp a ni chu a lawmawm hle a ni, a ti. Aizawl Civil Hospital-ah Jan Aushadhi damdawi dawr hawn a lo ni tawh a, Mizoram chhunga district tinah hawn tuma hmalak mek a ni, Health Minister chuan, a ti a. Chief Minister's Free Medicine scheme hmanga mi rethei ten damdawi inah a thlawna damdawi an dawn theihna tur ruahmanna kalpui mek a nih thu a sawilang bawk.
Jan Aushadhi dawr-a damdawi te hi a man to dan a zirin category 3 (A,B,C) ah then a ni a. A man to chi chu – A, a laihawl – B, a man tlawm chi – C tia bithliah a ni. Company hrang hrang siam damdawi te nen a danglamna chu a tuamna (packing) leh a cheimawina te a awm ve lo a. Hei hian Jan Aushadi damdawi man a tihniam a, a quality chhe chuang si lovin a man a tlawm theihnan a tuamna changkang lo zawk an hman bakah a hralhna hlep pawh a tlem zawk a ni. India hmarchhak state te zingah Mizoram hi Jan Aushadhi damdawi dawr nei hmasa ber leh awm chhun kan ni a, state lian zawk tam tak pawhin an nei lo a ni.
Jan Aushadhi Store hi sawrkar laipuia Dept. of Pharmaceutical leh Information & Communication Technology (ICT) Department nena inremna thuthlung ziakin CSC te nen zawrhchhuah a ni a. Health leh ICT changtu Minister in a hawn tak Hruaizel Pharmacy hi CSC leh Jan Aushadhi inkawp dawr hmasa ber a ni. CSC hi Digital India hnuaia hmalakna niin mipui ten electronic service hmanga sawrkar office tlawh kher ngai lova sawrkar dawr theihna a ni a. CSC hi Mizoramah 136 awm mekin CSC ang tho, a hming erawh thlak danglam Rural Information Kiosk hi 300 dang a awm bawk. CSC kaltlang hian Income Certificate, Tribal Certificate leh Residential Certificate a lak theih reng a. Electric leh tui bill pekna tur ruahmanna pawh siam mek a ni. Apollo Telemedicine nena thawk hovin CSC kaltlang hian Internet hmangin phai doctor thiam leh super specialist te pawh rawn theih an ni.
JAS leh CSC inkawp Hruaizel Pharmacy hawnna inkhawm hi ICT Secretary Pu C.Lalhmachhuana'n a kaihruai a. Health Principal Secretary Dr.K.Ropari, Chief Informatics Officer Dr.Lalthlamuana, Food & Drug Administration Jt.Director Pu Lalsawma bakah Ward 13 bialtu AMC Councillor Pi Zonunsangi ten thu an sawi a ni.
