Nizan (29.07.2016) dar 7 khan Lawngtlai District Disaster Management Authority (DDMA) leh World Vision, Lawngtlai tang kawp buatsaihin BRC Hall, Lawngtlaiah District Level High School Quiz Competition neih a ni a. Lawngtlai DDMA Chairperson Dr A. Muthamma IAS, District Bawrhsap ni bawk chu Khuallian a ni.
Khuallian chuan zirtirtu leh zirlaite'n an quiz buatsaih ngaihlu a, sikul paruk lai mai an tel chu lawmawm a tih thu a sawi a. Chhiat rupna hmachhawn dan chungchangah Mizote'n zir tur kan la ngah thu sawiin, chhiatna lo thleng tura rinhlelhna a awm a nih chuan hmun him zawka insaseng thuai thin tur a ni, a ti.
World Vision Chhimtuipui Area Programme-a MCHN Coordinator Pu HL Rinawma chuan chhiat rupna hmachhawn dan tur sawiin, chhiat rupna lo thleng tur chu a hun tak hriat lawk theih a nih thin loh avangin inpuahchah lawkna tha tak nena hmun him zawk buatsaih leh, chhanchhuah hna leh chhawmdawl hna kalpui dan tur lo zir lawk chu a pawimawh hle a ni, a ti a. Inhmakhawsuih leh inring renga awm a tul laiin, mipui tichi-ai zawnga thu theh darh erawh chu thil tha lo tak leh dan bawhchhiatna a nih thu a sawi.
He quiz intihsiakah hian Lawngtlaia high school paruk - ML Junior English School, Govt Region High School, Jehova Jire English School, Ngurnunsangi English School, Don Bosco School leh Downtown English School te an tel a. Downtown English School chu pakhatna niin, pahnihna chu Jehova Jire English School an ni a, Ngurnunsangi English School chu pathumna an ni. Lawngtlai DDMA leh World Vision, Lawngtlai tang kawp hian essay leh painting competition pawh an lo buatsaih tawh a. Chuta lawmmante chu he hunah hian sem nghal a ni.
He hun hi World Vision lam atangin Pi Irene-in a kaihruai a. Lawngtlai DDMA Nodal Officer Pu Vanlalchhuanliana MCS, SDC chuan lawm thu sawiin hun a khar a ni.
