Vawiin chawhnu khan Lunglei Circuit House Conference Hall-ah UD&PA hotuten Lunglei chanchinbu mite kawmna hun an nei a. Lunglei DC Pu Abhijit Vijay Chaudhari-a’n press meet hi a kaihruai a ni.

UD&PA Director Pu Zorammuana, MCS chuan Swachh Bharat Mission (Urban) chu October ni 2, 2014 a hawn a ni tiin Lungleiah pawh 1st Phase kalpui tura hma lak mek a nih thu a sawi a. Kum 2019-ah Mahatma Gandhi pian champhaphak 150-na denchhena India chu Open Defecation Free ram a puan hman an tum thu a sawi a. Inthiarna thianghlim zawk sa turin YMA te nena thawhhona thuthlung an ziah fel tawh thu a sawi bawk a ni.

UD&PA Director chuan Pradhan Mantri Awas Yojana-Housing for All by 2022 Mission kaltanga Beneficiary Led Construction (BLC) hnuaiah insak tanpuina dil Lunglei atangin chhungkua 2888 an awm thu leh Credit Linked Subsidy Scheme (CLSS) hnuaia insak tanpuina dil chhungkua 1775 an awm thu a sawi a. Kum 2022-a India zalenna champhaphak vawi 75-na denchhenin chhungkaw tin ten chenna in an neih theih nana he scheme hi kalpui mek an nih thu a sawi bawk a ni.

He hunah hian UD&PA hnuaia scheme hrang hrang kalpui mekte sawi hona neih tel a nih bakah leh zawhna leh chhanna hun hman a ni.