Vawiin khan Aizawl Hospital & Reasearch Centre chuan Synod Conference Centre-ah an din champha vawi 10-na lawmna chu an nei a, Health Minister Pu Lal Thanzara leh Bialtu MLA Pu Vanlalzawma’n an hmanpui.
Khuallian Pu Lalthanzara chuan Mizorama Private Hospital neih hmasak Aizawl Hospital kum 10 tlin lawmpuina leh duhsakna a hlan a. Mizorama Dispensary hmasa Mission Venga Dr. Fraser-a ten kum 1908-12 vela bul an lo tan leh Dr. John Williams (Pu Daka) hova Durtlang Hospital kum 1923-24 a an lo din, tun thlenga Mizo mipuiin an chhawr tangkai em emte hi ‘Chhandamna Chanchin Tha’ in a rawn ken tel a nih dante i hre reng ang u, a ti. Ptrivate hospital-te hi tihdam rawngbawlna lama mithiam lo pung zelte, sawrkarin hna (employment) a pek sen lohte tan hna hmuh leh an thiamna hman tangkaina tura kawng lo hawn saktu hmasa ni a; natna hrang hrang avanga harsatna nei, sawrkar damdawiina enkawl sen loh an chhawk zangkhai a, sawrkar ko tizangtu an nihnaah sawrkar angin lawmthu a sawi bawk. Health Care (damlo enkawl) sumdawnna hlawk bera sawi a ni fo a, a chhan chu rethei leh hausa te natna hian a hrut rual vek a; Aizawl Hospital chu Private Hospital lian ber ni mahse investment thaber a nihna lamah chuan kalna lutuk lova, Isua Krista rawngbawlna pawimawh tak hniak hnung zuia thawk tute in nih hre reng chunga sum lama hlawkna dah lianber lo turin a chah.
Health Minister chuan thu a sawi zelnaah Aizawl Civil Hospital tih changtlun leh Referral Hospital-a Medical College din te, Zemabawk Cancer Hospital thuamthat hna chak taka thawh mek zel a nih thu te; Mental Hospital din a nih theih thuai nan pawh hma chak taka lak mek a ni, a ti a. Ram hrisel leh sel lo tehna pawimawh tak IMR leh MMR rate tih hniam tumna kawngah pawh sorkar nen a thawh hona tha tak nei chhunzawm turin a sawm bawk. Tun hnaiah Opposition MLA zahawm tak pahnihin Referral Hospital, Falkawn-a hmalaknate an an tlawh chu a lawmawm hle a, thawktuten Company lam atanga leiba rulh that a nih loh vang leh thawktu indaih loh avanga ‘RSBY Cashless’ kalpui thin chu hun engemaw chen a khaihlak thu leh an harsatnate an lo hrilhfiah chunga, chanchinbua Referral Hospital mipuiten an dem theih tur zawnga thu an chhuah luih tir talh erawh chu a vanduai thlak a tih thu a sawi bawk. Khuallian hian Aizawl Hospital 10th Anniversary puala he damdawi in din tirha mi tangkaite hnenah Citation a hlan bakah Souvenir kawm tur a tlangzarh sak nghal a ni.
Khualzahawm Bialtu MLA Pu Vanlalzawma pawhin Aizawl Hospital kum 10 an tlin lawmpuina hlanin hun rei tak chu Mizoten damdawi in din hi sorkar tih tur chauhah kan lo dah avangin health care lamah duh angin hma kan sawn chak lo phah a a hriat thu a sawi a. Mizoram-ah private hospital engemawzat din tawh leh la din turte ngaihtuahin sorkar pawhin an zawm tur Dan (hospital regulations) felfai taka a duan a tul a tih thu a sawi bawk.
Aizawl Hospital & Research Centre Medical Superintendent Dr.Laltanpuia chuan Anniversary lawmnaa kal zawng zawngte lawmna thu a sawi a. AH&RC Managing Director Dr.Lalrinawma Hnamte-in an bultan dan leh kum 10 chhunga an hmasawn dan Report-ah a tarlan danah chuan tun dinhmunah Aizawl Hospital-ah khum 150 leh hnathawk 205 awmin Mizorama private hospital lian ber a nih thu leh Department kim tak an neih bakah ICU khum 10 awmna, CT Scan, dialysis tihna khawl 4 an neih tawh thu leh Pathologist thutchilh reng hospital awmchhun an nih thute a tarlang a. Kum 10 tlin lawm nan Tachhip-ah Free Clinic an huaihawtnaah a thlawn vekin damlo mi 400 chuang an en thu te, Hospital staff ten mi harsa zualte tanpui nan an hlawh atangin thawhlawm an thawh thin thu leh Anniversary puala Blood Donation Camp buatsaih an tum thu a sawi bawk. Aizawl Hospital kum 10 din champha lawmna inkhawm hi Dr.B.Lalduhawma, Board Member-in lawmthu sawinain hun a khar a ni.
