3457/2023-2024

Aizawl, 24th January, 2024 : Nimin tlai dar 4:30 khan Regency Hotelah MYC Chairman Pu Malsawmzuala Ralte chuan United States Agency International Development USAID atanga lokal Pi Kachina Chawla leh Pi Sharmila Neogi Health System Strenghtening Division USAID, New Delhi te a hmu a. Mizo thalaite nen an thawhho theihna tur te an sawiho.

Pu Malsawmzuala Ralte chuan Mizo thalaite chu pianpui finna leh thiamna (skill) lamah an sang a, amaherawhchu hun remchang leh hmun remchang an neih loh avanga an theihna (potential) ang te la chhuak lo mai niin a sawi a. Mizo thalai tanpui ngai thenkhat ruihhlo bawiha awm te chhanchhuah nan enkawlna changtlung leh felfai (Professional) tak awm tura a duhthu te a thlen a. Hna hnathawk thei thalai awm tamna-ah hna thawh tur mumal a awm lo chu thil inhmeh lo a inhmeh lo tak a nih thu a sawi a. Hna harsa chuan khawtlang harsatna hrang hrang, a bikin thalaite chungah a siam tam niin a sawi.

USAID hotute pawhin an theih ang ang a puibawm turin an inhuamthu leh Mizoram sorkarin thalaite enkawltur bik liau liau MYC a siam chu tha an tih thu an sawi a. Hriselna lam leh zirna lamah te thawhho theihna tur ang ang te an sawiho a ni.

MYC Chairman hian USAID hotute Mizoram a an lo kal vang vang chu lawmthu a sawi bawk.

USAID hi US sorkarin a din niin India nen kawng hrang hrang ei leh bar hmasawnna te, zirna leh hriselna lamah te an thawk dun mek a. Hetianga thawhho theihna dapin Mizoramah hian an lo kal a ni.