Zobawk Group YMA chuan ‘Ram leh hnam humhalh’ tih thupui hmangin 20^th – 21^st April 2018 hian Venghlun Mualah Group Conference vawi 19-na an hmang a. Lunglei East Assembly Constituency bialtu MLA leh Mizoram Youth Commission (MYC) Chairman ni bawk Pu Joseph Lalhimpuia chuan khuallian niin a hmanpui.

Pu Joseph Lalhimpuia chuan khawtlang leh ram leh hnam hmasawnna atana thahnemngai taka hma la thin tu Zobawk Group YMA hruaitute inpekna leh thawhrimna chu fakawm a tih thu sawiin an hmalak zel na turah duhsakna a hlan a. Zobawk hmasawn zelna tura sawrkar hmalakna hrang hrang te pawh tarlangin Zobawk North-a Community Hall sakna turin sawrkarin NEDP kaltlangin sum a ruahman fel tawh thu kalkhawmte a hrilh a. Kuthnathawktute dinhmun chawikan chu sawrkarin a ngai pawimawh takzet a ni tiin awlsam zawka an thlai tharchhuah te an phurchhuah theih nan Agriculture Link Road laih mek zel a nih thu a sawi bawk. Hmasawnna tluantling nei turin zirna kan ngaih pawimawh hmasak a tul a ni tiin hemi kawngah hian sawrkarin chak takin hma a la chhunzawm zel a, NABARD sum kaltlangin Zobawk Primary School, Middle School, High School leh Higher Secondary School  building-te sak that an nih tur thu a tarlang a ni. Zobawk leh a chhehvel a zirlai ten result tha tak tak an nei chho zel chu lawmawm a tih thu sawiin kalkhawmte chu zirna leh thiamna ngai pawimawh chhunzawm zel turin a chah bawk.

A sawi chhunzawm zel naah MYC Chairman chuan kawng hrang hranga thalaite fuihna leh chochhuahna atan Mizoram Youth Commission chuan chawimawi tlak te a chawimawi zel dawna, Young Achiever Award te buatsaih a nih tur thu a tarlang a ni.